Patna, Risaw:
U Prashant Kishor, uba long mynshwa u riewstad bad shemphang ha ki kam ilekshon, u la pyllait paidbah ïa ka kynhun Jan Suraaj jong u, kum ka seng saiñpyrthei, ha ka sngi Balang, kum shi bynta ban pynpaw ïa ka jingrung sha ka kam saiñ pyrthei.
Ka Jan Suraaj Party kan ïakhun ha baroh ki konstitwensi jong ka Bihar ha kane ka ilekshon Assembly ka ban wan.
U Manoj Bharti, uba long u ophisar uba la shongthait na ka Indian Foreign Service un ïalam ïa kane ka seng.
Ha ka jingpyllait paidbah ïa ka seng, u Kishor u la ong ba lada un shah jied, ka seng kan pynkut noh ïa ka jingkhang ne jingpyrkhing halor ka kyiad ha ka jylla bad kan pyndonkam ïa ka kamai ban kyntiew ïa ka pule puthi.
U Kishor uba kwah ïa ka tynrai halor ka jingthep vote, kham mynshwa u la ong ba ka jinglong nongïalam jong ka seng kan dei ka rai jong ka ki briew kiba la trei na ka bynta katei ka kynhun ha kine ki ar snem ba la dep.
La palat ar snem, u Kishor u la leit kylleng ka jylla, da kaba pynsngewthuh shaphang kaei kaba u ong ba ka dei ban long ka mat ïakren ha ka ilekshon.
Ha kaba sdang jong une u snem, u la pynbna ba u la pynkhreh ban plie paidbah ïa ka seng saiñ pyrthei.
Ka Jan Suraaj jong u, u la ong, kan ai ïa ki paidbah ïa ka lad kaba thymmai.
“Ha Bihar, ha kine ki 25 haduh 30 snem ba la leit noh, ki briew ki la jied ïa ka seng RJD ne ka seng BJP. Kata ka jingshah pynbor ka dei ban kut noh. Ka lad kam dei ban long jong kano kano ka seng, hynrei ki briew kiba kwah ban seng ïa ka seng,” u la ong.
U Kishor u la sdang ban ïakren halor ka jingthmu halor ka Jan Suraaj hadien ba u la don shipor ha ka seng kaba bat ïa ka jingsynshar ka Janata Dal-United jong u Myntri Rangbah ka Jylla u Nitish Kumar bad ka jingpyrshang ban khanglad da ka seng Congress ban pynrung kam ïa u ha ka seng na ka bynta ban pynim biang ne pynthymmai.
