Mumbai, Risaw:
Kumba la sakhi na ka jingkhmih bniah, la ong ba ki la don 1,830 tylli ki aplikeshon ban pan tiket na ka bynta ka jingïakhun ïa ka ilekshon Assembly ba la ïoh ban pdiang da ka seng Congress ha Maharashtra. La ong ba kiba bun na ki nongthep vote ki dei kiba na ki thaiñ Vidarbha bad Marathwada jong ka jylla.
Ïa mynta ïa ki tarik ban pynlong ïa ka jingthep vote ym pat lah ban pynbna na ka bynta ka Maharashtra. Hynrei kumba la mut, la ong ba ka seng ka lah ban ïakhun da kumba 100 tylli haduh 110 tylli ki konstitwensi na ki 288 tylli. Katba ka Haryana ka dang pynkhreh ha baroh ki liang na ka bynta ka jingthep vote kaba la long ha kane ka sngi ka 5 tarik, Risaw, ka seng Congress ka la ïoh ïa palat 2,500 tylli ki aplikeshon na ka bynta ka jingïakhun tang ha ki 90 tylli ki konstitwensi.
Ha Maharashtra, ki nongaplai ki siew ïa ka bai pynrung kyrteng haduh T.20,000. Katkum ka jingong jong ka seng Congress, la ong ba ka Maharashtra ka lah ban ïoh kham bun ki nongaply ban ïa ka Haryana kumba la sakhi. U Myntri Rangbah barim jong ka Maharashtra u Prithviraj Chavan u la pynpaw ïa ka jingkmen bad ong ba kane ka jubab ka dei namar ka jingjop jong ka seng dang shen ha ka ilekshon Lok Sabha.
“Ka seng Congress ka la paw kum kawei na ki seng ba donbor bad kaba la pyntieng ïa kiwei pat, naba ka la don ïa ki 13 ngut ki MP jong ka Lok Sabha bad uwei u MP shimet kiba la ai jingkyrshan ïa ka kynhun Maha Vikas Aghadi (MVA) ha kaba la lamkhmat da kumba 65 percent ha ki Assembly konstitwensi. Kane ka jingkiew jong kiba kwah ban thep kyrteng ka dei ka dak kaba bha na ka bynta ka jingkyrmen jong ka seng ha Maharashtra,” u la bynrap.
U Myntri barim u Nitin Raut, uba long shi bynta jong ka kynhun ba dei khmih bniah bad kylli jingkylli ïa kiba aply tiket u la ong ba ka jingbun eh jong ki aplikeshon ka la wan na ki thaiñ Vidarbha bad Marathwada, ha kaba ki Dalit, ki Muslim bad ki Maratha ki sdang ïa ka tynrai na ka bynta ka Congress bad ka kynhun MVA.
Ki nongïalam ha Maharashtra ki la ai jingmut ba wat la kane ka pyni ba ka Congress bad ka MVA ki dei kiba la kwah da kiba bun ha ka jylla, hynrei kane ka wanrah ruh ïa ka jingeh ïa ki nongïalam ka seng, namar ba kin hap ban pynïaid bha ïa ki jinglong hapoh jong ka bad ban jied ïa ki kyrtong kiba biang. Ka jinglah jong ka seng ban leh kumta kan long kaba kongsan bha ban pynthikna ïa ka jingjop jong ki ha ka ilekshon ban wan.
