Bengaluru, Risaw:
Ki pulit jong ka Lokayukta ha ka 27 tarik, Nailur, ki la buh jingmudui ejahar pyrshah ïa u Siddaramaiah, ka kurim jong u ka Parvathi B M, u kynum u Mallikarjuna Swamy, Devaraju ha kaba u Mallikarjuna Swamy u la thied jaka bad ai sngewbha ïa ka – bad kiwei kiwei, hadien ka hukum jong ka Ïingkashari bakyrpang ha ka 25 tarik, Nailur. U Pradeep Kumar S P, uwei na ki nongujor ha ka mukotduma MUDA (Mysuru Urban Development Authority) , ha ka sngi Palei, u la kynnoh ba u Myntri Rangbah ka Jylla u Siddaramaiah bad kiwei ki thmu ban pynduh pyndam noh ïa ki sabut baroh halor ka kam bamsap bad kyrpad ïa ka Enforcement Directorate ba kan leh ei ei pyrshah ïa ki. Ka kynhun ED ka la buh jingthoh ruh ha ka Enforcement Case Information Report (ECIR), ka ban ïaryngkat bad ka jingmudui ejahar jong ki pulit, pyrshah ïa u Myntri Rangbah halor ka jingshah kynnoh ba u la pyndonkam bakla ïa ka bhah jong ki 14 tylli ki jaka ba la ai sha ka kurim jong u da ka MUDA.
