Bengaluru, Risaw:
Ki la don palat shihajar ngut ki nongshong shnong ka Uppunda ha ka distrik Udupi kiba la kem pang hadien ba ki la dih ïa ka um kaba jakhlia na ka top um kaba don ha kane ka thaiñ, la ïathuh ki heh ka tnad ka koit ka khiah ha ka Sngi Thohdieng.
“Ym don shuh ki ban shitom jur bad kiba bun na kine ki nongshong shnong ki la koit namar ba ki la ïoh da ki dawai kiba ïadei bad ba ki la shah sumar ha ka por ba biang ha kane ka jaka ai jingsumar,” la ïathuh u heh ba dei khmih.
Kitei kiba la kem pang, ha kaba kham bun na ki ki dei kiba na Karki Kalli bad na Madikal Ward jong ka Uppunda Gram Pancha-yat ha ka thaiñ Byndoor, ki la ïathuh ba ki don ïa ki dak ki shin, kum ka prie bad ka pynhiar.
“Ki dkhot jong kiba bun ki longïing jong kine kiba la dih ïa katei ka um ki dei kiba la don ïa kijuh ki dak ki shin, ha kaba kine baroh ki la pynshisha ba ki la shah ktah ha ka jingpang hadien ba ki la dih ïa ka um na kajuh ka top,” la bynrap shuh shuh u heh sorkar. U ophisar jong ka tnad ka koit ka khiah jong ka Udupi distrik u Dr I P Gadadh u la ong ba la lap ïa ki jait khñiang jingpang “Waterborne Pathogen Salmonella Bacillary” ha ka um ba la sam sha ki ar tylli ki Ward.
“Ngi la phah ïa ka kynhun ban tohkit ïa kane ka jinglong jingman sha baroh ar tylli ki shnong bad ki shnong ba marjan kiba pyndonkam ïa kane kajuh ka tyllong um, ha ka 30 tarik, Nailur bad ngi la lap ïa ki jait jong une u khñiang ha ki 56 ngut ki nongpang.
Haduh mynta ka sngi, ngi la lap kumba 150 ngut kiba la shah ktah ha u khñiang jingpang, ” u la ong.
Katkum ka jingïathuh jong ki dkhot ka Gram Panchayat jong ki ar tylli ki ward, la ong ba kam shym la don ka um haduh lai sngi shwa kane ka jingjia bad hadien kane, ki shnong ki ïoh ïa ka um kaba jyrngam bad kito kiba pynkhuid ne pynthnam ïa ka shwa ban dih kim don dak jingpang.
“Ngi dang tohkit ïa ka daw jong ka jingpynpoi ïa ka um kaba jaboh”, la ong u Gadadh. Ki nongshong shnong ki la kynnoh ba ka jingbym sumar ne pynkhuid bha ïa ka top um ka la pynlong ïa ka um ba kan jakhlia.
Ïa mynta la khang noh ha ka ban sam ïa kane ka um na kane ka top haduh ban da lah ban pyntikna ba ka la long kaba bit ban pyndonkam bad ban dih.
Ki nongshong shnong ki la dawa ban tohkit bniah halor katei ka jingjia bad ban shim noh mardor ïa ki lad ki lynti ban weng ïa ki jingeh baroh khnang ba kan ym ktah ïa ki ha kaba ïadei bad ka jingïoh um ba ki dei ban pyndonkam man ka sngi.
