Thiruvananthapuram:
U Myntri Rangbah jong ka Kerala u Pinarayi Vijayan u la pynbna ba ka sorkar jylla sa shisien kan pan jingïarap na ka sorkar kmie ban ai jingïarap kaba biang na ka bynta ki thaiñ kiba la shah ktah na ka jingtwa khyndew ha Wayanad kaba la jia ha ka 30 tarik, Naitung, 2024.
U Myntri Rangbah ka jylla u la ong ba ka sorkar jylla ka la pan pisa da `. 219.200 klur, kum ka jingïarap ka kyrkieh, nalor ka jingmang pisa jong ka sorkar kmie na ka bynta ka State Disaster Response Fund mynta u snem.
Shuh shuh u Myntri Rangbah u la ong ba `.145.6 klur la mang kum ka jingïarap kaba la phah hashwa.
U la ong, “Katkum ka jingsngewthuh na ka khubor ba la pyllait da ki nongthoh khubor la ong ba ha ka 1 tarik, Risaw, ka song tyngka kaba ar kaba long `. 145.6 klur la dep ban mang kum ka jingai jingïarap kaba hashwa. Kane ka long tang ka jingpyntreikam kumba ka dei ban long kaba thikna. Ka la don ka jingkular ban bteng ban ai jingïarap ïa ka jylla wat ha ka por ba don ka jingshah pynjulor ha ka Wayanad. Hynrei ngim pat ïoh ïa kata ka jingïarap haduh mynta.”
U Myntri Rangbah ka Jylla u la ong ba haduh mynta ka sorkar kmie kam pat ai kano kano ka jingïarap sha ka Wayanad distrik, kaba la shah ktah ha ka jingtwa khyndew ha Kerala.
Kane ka la jia jan ar bnai hadien ba u Myntri Rangbahduh ka ri u Narendra Modi u la leit jngoh ïa ka Wayanad kaba la shah ktah ha ka jingshah pynjulor ha ka 10 tarik, Nailar, 2024.
U Myntri Rangbah-duh u la kular ïa baroh ki jingïarap ba donkam sha ka jylla bad u la ong ba ka pisa kan ym long ka jingkhanglad.
Kum ka jingbatai shai sha ki lad pathai khubor hadien ka jingïalang jong ka kynhun Myntri, u Vijayan u la pynbna ruh ba ka kynhun Myntri ka la shem ïa ka Nedumbala Estate ha Meppadi Panchayat bad ka Elstone Estate ha Kalpetta Municipality kum ki jaka kiba biang tam ban tei ïa ki Model Township na ka bynta ban ai jaka sah shipor ïa ki lanot kiba la ngat ha ka jingtwa khyndew.
U la ong ba ka jingpynbha kan long ha ki ar bynta. Ha ka bynta kaba nyngkong, yn pynbha pat ïa ki longïing kiba la duh ïa ki ïing ki sem bad ki jaka puta ha ka jingshah pynjulor.
Ka jingpynbha pat ha ka bynta kaba ar kan long na ka bynta ki longïing kiba ki ïing jong ki ki don ha ki jaka bym lah ban shong mynta.
U Myntri Rangbah u la pynbna ruh ba ka tnad Women and Child Development ha ka jylla kan ai pisa da T.10 lak sha ki hynriew ngut ki khynnah kiba la duh noh ïa baroh arngut ki kmie ki kpa bad `.5 lak sha ki 8 ngut ki khynnah kiba la duh noh tang ïa ka kmie ne tang ïa u kpa ha ka jingtwa khyndew ha Wayanad.
