Amaravati, Risaw:
U Myntri Rangbah ka Jylla u N Chandrababu Naidu ha kine ki khyndiat sngi ba la leit, u la pynbna ba ka World Bank ka la mynjur ban ai ram da T .15,000 klur sha ka sorkar jylla na ka bynta ki kam ban kyntiew ïa ka nongbah Amaravati.
U la bynrap ba ki kam kin sdang naduh u bnai Nohprah. Kane ka jingpynbna ka la long hadien ba u Naidu u la ai jingkren sha ki lad pathai khubor ha New Delhi hadien ka jingïakynduh bad u Myntri Rangbahduh ka ri u Narendra Modi, bad ka kynhun jong ki Myntri ka sorkar kmie ha ka Sngi Ba-ar.
Kum shi bynta ban pynshai halor ka jingïakren jong u bad u Modi ha katei ka sngi, u Naidu u la ong ba ka sorkar kmie ka la mynjur ban pyllait pisa da T.12,500 klur na ka bynta ka Polavaram Irrigation Project.
Haba pynpaw ba ka kompeni heh jong ka umphniang bad gas ka BPCL (Bharat Petroleum Corporation Limited) kan buh ïa ka jaka pynkhuid umphniang ha kaba ka jingbei tyngka kan kot sha ka T.85,000 klur ha ka jylla, u Naidu u la ong ba ka kompeni mynta ka dang pynlong ïa ka jingwad bniah ban buh ïa ka jaka.
Haba jubab halor ka jingkylli, u la ong ba baroh ar tylli ki jylla kata ka Telangana bad Andhra Pradesh ki dang don ha ka jingïakren ban pynbeit ïa ki jingeh kiba dang sahteng kiba ïadei bad ka jingshah pynïakhlad ki arliang mamla.
Halor ka mat jong ka Visakhaptnam Steel Plant, u Naidu u la kdew ba ki dang wad ïa man la ki lad ki lynti, kynthup ïa ka jingpynïasoh bad ka SAIL (Steel Authority of India Limited).
Ka jingkyrpad ha kaba ïadei bad kane kajuh la ai sha ka sorkar kmie, u la ong.
Haba phai halor ka jingshoh ba la phah ha ka rynsan X, u Kumaraswamy u la thoh, “Mynta ka sngi ha New Delhi la pynlong ïa ka jingïakren kaba kongsan bha kaba pynleit jingmut ha kaba ïadei bad ka jingpynkhie-im biang ïa ka RINL Steel Plant – (Vizag Steel) ha ryngkat u Myntri Rangbah ka Andhra Pradesh u Shri @ncbn avaru.
Kane ka jingïalang ka thmu ban ïakren ïa ki buit bad ki jingthmu ba kongsan ban kyntiew ïa ka jingtreikam jong ka karkhana bad ban pynthikna ïa ka jingroi kaba neh jong ka.
Hadien kane, u Naidu u la ïakynduh ïa u Myntri ka tnat Road and Transport jong ka sorkar kmie u Nitin Gadkari bad pynlong ïa ka jingïakren halor ka jingpynroi ha baroh ki liang ïa ki surok bah jong ka National bad State Highways ha Andhra Pradesh.
U Myntri Rangbah ka jylla u la buh jingkyrpad halor ka jingpynbha bad kyntiew ïa ka Vijayawada Eastern Bypass, bad ki song jingïarap na ka sorkar pdeng na ka bynta ki surok bah jong ki jylla.
U la kyntu ïa u Gadkari ban pynsted ïa ka Kuppam-Hosur Greenfield Project bad ban pynthikna ban pyndep ïa ka hapoh ka por ba la buh.
Nalor kata, u Naidu u la kyrpad ban kyntiew ïa ka projek surok bah harud duriaw jong ka Mulapeta sha Vizag bad ban pynbeit ïa ki jingkhang ha ka surok kaba leit sha ka kad liengsuiñ Bhogapuram.
U la kyntu ïa u Gadkari ban pynbha ïa ka surok bah Hyderabad sha Vijayawada Expressway na ka saw sha ka 8 lane ban weng ïa ka jingeh kaba jur bad ban ïada na ki jingjia takhuh kali.
U la pan ruh ïa ka surok bah Greenfield Express na Hyderabad sha Amaravati bad ka Outer Ring Road (ORR) na ka bynta ki thaiñ ha ka nongbah Amaravati.
