Bhubaneswar, Risaw:
Ka sorkar ka la phah ïa ka jingthoh ha Orissa High Court ban pynshisha ba baroh ki jaka treikam jong ki pulit, lait noh tang 13 tylli, mynta ki la don ïa ki CCTV kiba treikam.
Kiba dang sah kin sa pyndep ha ka ban buh ïa ki CCTV hapoh ki 15 sngi ban wan.
Da kaba pynpaw ïa ka jingsngewkmen halor ka jingkiew ha kane ka kam, ka ïingbishar ha ka sngi Balang ka la buh ba ka 12 tarik, Naiwieng kan long ka sngi ban buddien shuh shuh ïa ka jingtreikam jong ki CCTV ha ki jaka treikam jong ki pulit.
Ka kynhun nongbishar jong u Chief Justice Chakradhari Sharan Singh bad Justice Saritri Ratho hadien ba ka la pule bniah ïa ka kaiphot halor ka jinglong jingman jong ki jaka buh CCTV ha ki jaka treikam jong ki pulit ba la ai da u Additional DGP (headquarter) u Dayal Gangwar u la ong,
“Ka long kaba pynsngewsih haba la tip ïa ki daw ba la jia ka jingjia ha ka jaka treikam jong ki pulit ka Bharatpur, bad ki heh sorkar jong ka jylla ki la shim ïa ki lad ki lynti kiba khlem pynsahteng na ka bynt ban pynbiang ïa ki jingdonkam.”
U Gangwar ha ka jingthoh jong ka jingpynshisha jong u, u la pynpaw ba u la ïoh ïa ki jingtip kiba pyni ba ki CCTV ha ki 496 tylli na ki 593 tylli ki jaka treikam jong ki pulit kim shym treikam shuh. Hynrei da ka jingshimkhia bad jingkyrshan jong u lyngba ki heh ophisar, mynta ki CCTV ki treikam ha baroh ki jaka treikam jong ki pulit ha ka jylla, lait noh tang 13 tylli ki bym pat lah ban pyndep.
Ïa ki 13 tylli ki jaka treikam jong ki pulit yn sa pyndep ban buh ïa ki CCTV hapoh ki 15 sngi ban wan, u la pynshisha. U nongïasaid aiñ jong ka jylla u la pyntip ruh sha ka ïingbishar ba ka sorkar ka dang don ha ka jingpynkhreh ïa ka Standard Operating Procedure (SOP) ban pynthikna ba kum kine ki jingjia ba dang jia shen kin ym jia shuh kumba la jia ha Bharatpur ha ki por ban wan.
Kumba la jia la ïathuh ba ha ka 23 tarik, u Nailur, ka ïingbishar ka la buh ïa ka PIL halor ka jingjia, ha kaba la kynnoh ba uwei u heh shipai u la shah pynibor bad ka briew kaba u la dep ban ïatehktien ka la shah kem bad shah thombor beiñ ha ka por ba ki dang don ha kti jong ki pulit.
U Gangwar u la shah thung kum u heh ophisar jong ka ïingbishar u ban ïarap halor kane ka jingkyrpad PIL. Ha ka 23 tarik u Nailur, ka ïingbishar ka la kwah ban tip na ka sorkar jylla kiei ki sienjam ba ka thmu ban shim ban ïada ïa ka burom jong ki briew ka tnad shipai. Ka ïingbishar ka la bthah ïa ka sorkar ba kan shim ïa ki rai ha kiba ïadei bad ki rukom pyntreikam jong ka kumno ban leh ïa ki shipai ha ki jaka treikam jong ki pulit.
