Bengaluru, Risaw:
Ha kum kane ka por bajur ka jingdawa ki nongïalam jong ki Backward Class (BC) ban pyntreikam ïa ka kaiphot wad bniah ïa ka imlang-sahlang bad ka pule puthi, kaba la tip paidbah kum ka jingkheiñ ïa ka jingdon ki jaitbynriew, u Myntri Rangbah ka jylla u Siddaramaiah u la ong ba ïa ka rai halor ka jingpyntreikam yn sa shim hadien ka jingïakren ha ka jingïalang jong ka kynhun Myntri ka ban long ha ka 18 tarik, Risaw.
Hadien ka jingïakynduh bad ki Myntri, ki nongthaw aiñ bad ki nongïalam jong ki kynhun ba dang sahdien ne ki Backward Classes, u Siddaramaiah u la ïathuh ha ki nongthoh khubor ba ka Karnataka ka dei ka jylla kaba nyngkong eh ha ka ri ban pynlong ïa kum kane ka jingwad khana samari halor ka jingdon ki jait bynriew ha ka por ba u long Myntri Rangbah ba nyngkong eh (2013 haduh 2018).
Ïa ka kaiphot halor ka jingwad bniah la aiti sha ka sorkar jylla ha u bnai Rymphang.
Hynrei u Myntri Rangbah u la ong ba um shym la khmih bniah ne ïaid lyngba ïa ka kaiphot.
Ka kaiphot, ba la pynkhreh da ka H Kantharaj Commission, kam dei tang na ka bynta ki Backward Class, hynrei ka la kynthup lut ïa baroh hynriew klur ngut ki briew jong ka jylla, la ong u Myntri Rangbah.
Ki nongthaw aiñ bad ki nongïalam na ki kymhun jaitbynriew BC ki la kyntu ïa u ba un pyntreikam ïa ki jingai jingmut jong ka kaiphot, u la bynrap.
U Siddaramaiah u la ong ba ha ka por ba u long Myntri Rangbah ba nyngkong, ka Commission ka la pynlong ïa ka jingjurip kaba bniah, hynrei ka kaiphot jong ka kam pat long kaba la pynkhreh ha katei ka por. La pyndep ïa ka ha ka por ba u HD Kumaraswamy u dang long Myntri Rangbah, hynrei u la kyntait ban pdiang ïa ka.
Hadien kata ka sorkar BJP ruh kam shym la pdiang ïa katei ka kaiphot. “Ngin sa shim ïa ka rai kaba biang hadien ba la ïakren ha ka jingïalang jong ka kynhun Myntri”, u la bynrap.
Hynrei ki tyllong khubor ki la ïathuh ba wat hadien ka jingïakren jong ka kynhun Myntri, ka lah ban long ba yn thaw ïa ka komiti barit jong ka kynhun Myntri ban peit bniah ïa katei ka kaiphot bad ban pdiang ïa ki jingai jingmut jong ka.
Ha ka lah sngi U Blei jong ka taïew, ka kynhun kaba don kumba 30 ngut eiei ki nongïalam, kynthup ïa ki Myntri, ki MLA, ki MLC, bad u Chairman barim ka State Backward Classes Commission u CS Dwarkanath, ki la ïakynduh ïa u Myntri Rangbah ka Jylla.
Ki la aiti ïa ka jingthoh, da kaba kyntu ïa u ban buh ïa ka kaiphot hakhmat ka kynhun Myntri bad ban pyntreikam ïa ka.
U nongïalam ka BJP u N Ravi Kumar uba dei tang ma u hi u MLC na katei ka seng ban don bynta ha katei ka kynhun, u la ong ba dei ban pynmih shwa ïa ka kaiphot. Ïa ka rai jong ka seng yn sa pynpaw hadien ba la ïaid lyngba ïa ka.
Ha kane ka jingïakynduh bad u Myntri Rangbah, u la ban jur ïa ka jingdonkam ban buh hakhmat eh ïa ka bha ka miat jong ki jaitbynriew kiba dang sahdien tam napdeng ki SC, ST bad OBC.
Katba ki nongïalam na ki jaitbynriew kiba shadien ki kwah ba dei ban pyntreikam ïa ka kaiphot jinglum khana samari halor ka jingdon ki jaitbynriew, ki jaitbynriew Vokkaliga bad Lingayat ki la pyrshah bad ki la ong ba ka long ka jingpyntreikam ka bym long katkum ka jingstad saïan.
Ki la don bun ngut ki nongïalam jong ka Congress na kine ki jaitbynriew kiba donbor ki pyrshah halor kane ka jingpyntreikam jong ka.
