New Delhi, Risaw:
Ka kynhun pulit haba ka la ïoh jingtip, ba la don uwei u briew uba la thmu ban kit ïa ki bom pataka bad buhrieh hapoh ki mar bam ha ka thaiñ Sultan Puri kaba don shabar jong ka nongbah Delhi; ka la pynlong ïa ka jingkhynra bad khmih bniah ha kaba ka la ïoh ban bat ïa kawei ka thuk thuk bad kem syndon ïa u nongñiah jong ka ba la tip kyrteng kum u Mohammad Aakib (24).
Ha kaba ïadei bad kane ka jingjia, la ïohkem ïa ar ngut ki briew ha Delhi bad na ka jingkhmih bniah la ïoh ban kurup baroh 104 kilo ki bom pataka na ki, la ïathuh ki heh pulit jong ka nongbah ha ka sngi Ba-ar.
Ka kynhun jong ki pulit ka la ïoh jingtip ba uwei u briew u la thmu ban kit ïa ki bom pataka ba la buhrieh hapoh ki marbam ha ka thaiñ Sultan Puri kaba don shabar jong ka Delhi, la ong ki heh pulit. Katkum ka jingïoh jingtip la ong ba kane ka kynhun ka la ïoh ban bat ïa kawei ka thuk thuk bad kem ïa u nongñiah, u Mohammad Aakib (24 snem).
U Akib u la phla ba u la ïoh ïa ki bom na kawei ka ïing buh mar jong u Talib Yusuf (46), la ong u heh pulit. Ka kynhun pulit ka la kem ïa u Yusuf na ka ïing buh mar jong u bad la kurup ruh ïa 93 kilo ki bom pataka, u la bynrap.
