Tura, Risaw 22
Kum ka jingbteng ïa ka thma pyrshah ïa ka jingma u drok kaba ka Jylla ka ïakynduh, ki pulit ka West Garo Hills hynnin ka sngi ki la kem noh ïa 4 ngut ki nongkhaïi drok najan ka shnong Raksamagre katba ki dang kit ïa u jingdih pynbuaid da ka kali shimet.
Kane ka jingjia ka la jia ha ka por kumba 10 baje jong ka miet Lah Sngi U Blei katkum ki jingtip kiba paka ba la ïohpdiang da ki pulit.
Kitei saw ngut kiba la shah kem ha katei ka jingjia ki dei ba la tip kyrteng kum u Ashanur Islam (Kharbanda), Shahinur Islam (Pekamari), Khuka Miah (Doyachar) bad u Sujon Mondal (Kularchar). Kine baroh saw ngut ki dei na South Salmara distrik jong ka Assam.
Katkum ki tyllong khubor na ki pulit, la ïoh jingtip halor kawei ka kali kaba la kynnoh pynkit mar be-aiñ bad hadien kane, ka kynhun Anti Narcotics Task Force (ANTF) hapoh ka jingïalam u SDPO ka Raksamgre, ka la bat ïa katei ka kali kaba don ïa u nombar AS-01-AQ-6447. Ïa une u jingdih la song bad thep bha ha ki synduk sabon.
Na kitei kiba shah kem, la ïoh kurup haduh 81.22 gram u drok ‘heroin’ uba la antad ba ka dor ka long palat T.7 lak.
Haba ïadei bad kane, la ujor mukotduma hapoh ka NDPS bad ïa baroh 4 ngut la kem noh bad la phah sha patok.
Nalor kane, ka jingtohkit ban lap shuh ïa kiwei pat kiba donkti ha katei ka kam ka la ïaid shakhmat, ong u SP ka WGH, u Abraham T. Sangma.
