Mumbai, Risaw:
Ka seng Shiv Sena ba la lamkhmat da u Myntri Rangbah u Eknath Shinde ka la pyllait ïa ka thup kyrteng kaba nyngkong jong 45 ngut kyrtong ki ban ïakhun na ka bynta ka ilekshon Assembly ka ban long ha ka 20 tarik, Naiwieng ha Maharashtra ha ka miet jong ka sngi Ba-ar.
Kane ka thup ka don ïa ki kyrteng jong u Shinde, u ban ïakhun na Kopri -Panchpakhadi ha ka nongbah Thane bad kumba 6 ngut ki dkhot jong ka Cabinet na ki konstitwensi jong ki.
Kane ka seng kaba bat ïa ka jingsynshar ka la pynrung kyrteng biang lajan baroh ki MLA kiba la ai ka jingkyrshan ïa u Shinde haba u la ïalam ban ïakhun pyrshah ïa u Myntri Rangbah ha katei ka por u Uddhav Thackeray ha u Jyliew jong u snem 2022.
U Shinde un sa kyrpad na ka bynta ban pynjop na Kopri -Panchpakhadi ha ka jaka ba marjan ka Thane.
Ka seng ka la pynïakhun ïa ki Myntri kiba kynthup ïa u Gulabrao Patil, Deepak Kesarkar, Abdul Sattar bad u Shamburaj Desai na Jalgaon Rural, Sawantwadi, Sillod bad Patan. Sa uwei pat u dkhot jong ka kynhun Myntri, u Dada Bhuse, un sa ïakhun na Malegaon Outer Assembly konstitwensi ha Nashik distrik.
Ki Myntri kiba kynthup ïa u Uday Samant bad u Tanaji Sawant ki la shah pynbna kyrteng ban ïakhun na Ratnagiri bad Paranda.
Sa uwei pat u nongïalam ba pawkhmat u Sada Sarvankar un sa ïakhun ïa ka ilekshon na Mahim kaba don ha Mumbai. Ka seng ka la pynïakhun ruh ïa kiba bun ki MLA.
Kumba la pynbeit, la ong ba kiba bun na ki seng ki ban ïakhun ha ka ilekshon Assembly ha ka jylla Maharashtra ki la nang pynjur ïa ki jingpyntreikam bad ban buh ïa ki jingïalang halor kane ka bynta.
Ha kaba ïadei bad kane ka bynta, ka seng Congress ka la pynlong ïa ka jingïalang jong ka Central Election Committee (CEC) ha ka 20 tarik, Risaw na ka bynta ban ai ïa ka rai kaba khatduh halor ka jingjied kyrtong ki ban ïakhun na ka bynta ka ilekshon Assembly ha Maharashtra Assembly, la ïathuh ki heh nongïalam jong ka seng.
Katba ka seng Bharatiya Janata Party (BJP) ka la pynlong ïa la kajong ka jingïalang jong ka Central Committee, ha kaba la ïamir jingmut halor ki 100 tylli ki konstitwensi katba ka dang ap ïa ka rai halor ki jingïa-bhah Seat bad ki seng synrop hapoh ka kynhun Mahayuti.
Shuh shuh la ong ba ka Vanchit Bahujan Aaghadi (VBA) ka la dep ban pynbna ïa ka thup kyrteng kaba lai jong ki 30 ngut ki kyrtong ki ban ïakhun ha ka ilekshon.
Ka Election Commission jong ka India ha ka taïew ba la lah ka la pynbna tarik na ka bynta ban pynlong ïa ka ilekshon Assembly kaba ha kawei ka bynta bad kaba ha ar tylli ki bynta na ka bynta ka Maharashtra bad Jharkhand.
Ka Maharashtra kaba don bun ki konstitwensi da 288 tylli kan pynlong ïa ka jingthep ha kawei ka bynta kata ha ka 20 tarik, Naiwieng.
Ka Jharkhand kaba dei ka jylla ba shaphang Mihngi jong ka ri, kan sa pynlong ïa ka jingthep vote ha ki ar bynta kata ha ka 13 tarik bad 20 tarik u Naiwieng.
Ka tarik ban pynbna ïa ki nongjop kan sa long ha ka 23 tarik, Naiwieng. Ïa kine ar tylli ki ilekshon Assembly la pynlong seng Congress kaba la ap khmih lynti bad don jingkyrmen ban ïohrah ïa ka jingjop bad ban ïoh synshar biang ha ka jylla.
Ha Maharashtra, ka seng Shiv Sena (UBT), ka Nationalist Congress Party (jong ka kynhun u Sharad Pawar) bad ka seng Congress kin buh jingthmu na ka bynta ban bud biang ïa ki rukom pyntreikam kumba ka la long ha ka jingïakhun ïa ka ilekshon Lok Sabha 2024 ha kaba katei ka kynhun synrop ka la pynrem ïa ka kynhun synrop jong ka seng kaba bat ïa ka jingsynshar kaba kynthup ïa ka Shiv Sena (Eknath Shinde), NCP (ka kynhun jong u Ajit Pawar) bad ka BJP.
