Mumbai, Risaw:
U Zeeshan Siddique, uba dei u khun jong u Myntri barim jong ka jylla Maharashtra u Baba Siddique u la leit ban pynïasoh bad ka Nationalist Congress Party (NCP) kaba dei ka seng saiñpyrthei hapoh ka jingïalam jong u Symbud Myntri Rangbah u Ajit Pawar hynnin ka sngi. Une u la shah beh noh na ka seng Congress ha u bnai Nailar halor ka jingshah kynnoh ba u la ai jingkyrshan pyrshah ïa ka seng ha ka por ba don ka ilekshon Legislative Council ha Maharashtra, ha kaba na ka liang jong u, u la kyntait halor kane ka jingkynnoh.
“Ka dei ka sngi kaba la ktah bha ïa ka ïing ka sem jong nga. Nga pynpaw ka jingsngewnguh ïa u Ajit Pawar, u Praful Patel, u Sunil Tatkare kiba la sngewthuh shisha ïa nga kum ha kane ka por ba nga don hapdeng ka jingïakynduh jingeh. Nga la shah pynrung kyrteng ban ïakhun na Bandra East, nga tikna ba da ka jingïeid bad ka jingkyrshan jong ki paidbah, khlem pep ngan sa jop ha ka jingïakhun ïa ka ilekshon na Bandra East,” la ong u Zeeshan hadien ba u la dep ban pynïasoh bad ka seng NCP.
