Srinagar, Risaw:
Kumba la paw ha ka jingthoh ba la phah, u PRO jong ka tnat ïada ri ha Srinagar u la ong ba ki lehnoh Pakistan, da ka jingthmu ban pynthut ïa ka shongsuk-shongsaiñ ha Kashmir, ki la thombor da ka jingtieng ïa kawei ka kynhun shipai hapoh ka kali kaba kit ïa ki shipai bad ki nongkit mar na ka thaiñ.
Ki shipai kiba la pynkhreh bha ki la pynphai kylla khlem da pynslem ïa ka jingsiat, ha kaba kane ka la pynlong ïa ki lehnoh ba kin kynran dien noh, da kaba iehnoh ïa ka tiar siat bad kawei ka pla thep jingthep, u la ong, da kaba bynrap ba ki la phet krad shapoh ki sañium bad jah noh khlem lap dien shuh.
U la ïathuh ba arngut ki shipai bashlur kiba kynthup ïa u Rifleman u Kaisar Ahmad Shah na Anantnag (J-K) bad u Rifleman Jeevan Singh na Sirsa (Haryana), ki la khlad noh hadien ba ki la mynsaw ha ka por ba don ka jingïasiat ba markyliang bad ki lehnoh.
Ka tnat shipai Army ka la ai burom sha kine ki shipai kiba la kyrshan dohïap wat la ki la shah siat ban pynher krad ïa ki lehnoh da ka jingpynphai kylla jong ki ïa ka jingsiat bad aiti ïala kajong ka jingim, u la ong.
Kane ka jingpynibor jong ki shipai, ka la khanglad ïa ki lehnoh ban nang pynjulor shuh shuh, ong u PRO, da kaba bynrap ba ki la pyni ïa ka jingshlur bad ka jingaiti kaba khlem artatien ban ïada bad ai jingshngaiñ ïa ka ri bad ban ïakhun pyrshah ïa ka jingthmu basniew jong ka Pakistan kaba la pynshlur ïa ki kam lehnoh ha Kashmir.
U la ong ba ka jinglenlade jong ki ka long ka jingpynshisha ïa ka jingkut jingmut jong ki shipai India ban ïada ïa ka ri bad ki nongshong shnong jong ka.
Ha ryngkat ki shipai bashlur, arngut ki nongkit mar Kashmir kiba kynthup ïa u Zahoor Ahmad Mir, uba shong ba sah ha Boniyar Tehsil; bad u Mushtaq Ahmad Choudhary, uba dei u nongshong shnong jong ka Uri Tehsil ruh ki la khlad ha kane ka jingjia, u la ong.
Ka paw shai ba ki lehnoh Pakistan ki thmu ban thombor ïa ki trai shnong ha Kashmir da kaba pynjur ïa ki jingpyntieng pynsyier bad leh ïa ki kam thombor ha kane ka thaiñ kaba don jingthmu ban wanrah ïa ka shongsuk- shongshngaiñ, la ong shuh shuh u PRO.
“Tang kawei ka jingmut kaba kine ki lehnoh ki buh ka long ba kin wanrah ha kane ka thaiñ tang ki kam pyntriem.”
Ki shipai ki dang ïai bteng ban pynthikna ïa ka jingshngaiñ bad ka bha ka miat jong baroh ki nongshong shnong bad kin pynurlong da ka jingkut jingmut ban ïakhun pyrshah ïa ki kam pyntriem jong ki lehnoh bad ban kyntiew ïa ka jingïatylli ha ka them Kashmir, u la ong.
Ka jingaiti jong kine ki nong Kashmir bad ki shipai kiba shlur ïala ka jingim kan ai mynsiem ïa ki pateng ban wan ban ïeng pyrshah ïa ki kam pyntriem, u la bynrap.
