New Delhi, Risaw:
Ki la don kumba katto katne ngut ki nongïalam jong ki seng ka liang pyrshah kiba la pynrem jur halor ka jingshah thombor jong u Myntri Rangbah barim ka Delhi, u Arvind Kejriwal hadien ka jingkynnoh jong ka seng Aam Aadmi Party (AAP) ba la thombor ïa u nongïalam bad u nongai jingmut jong ka seng ha ka ri ha ka por ba don ka jingïalap ilekshon da kaba shu ïaid kjat ha Delhi. Ha ka jingkynthoh ba na sha lyndet pyrshah ïa ka seng Bharatiya Janata Party (BJP) halor katei ka jingshah thombor, u Myntri Rangbah barim ka Uttar Pradesh, u Akhilesh Yadav, u la ong ba ym donkam ban ong mano ba nud ban leh ïa kane ka kam thombor.
Da kaba ñiew ba kane ka jingjia ka dei “kaba la leh bakla”, u la ong ruh ba ka jingleh donbor ka pyni ïa ka dak jong ka jingshahrem. “Ka khubor halor ka jingshah thombor jong u Arvind Kejriwal ha ka por ba pynlong ïa ka Padayatra ha Delhi ka long kaba dei ban pynrem bad kaba sngewkhia. Ym donkam ban ong mano ba lah ban leh ïa kane ka jingthombor. Baroh ki tip ba ki jongno ki nongrim ha ka kam saiñ pyrthei ha India kiba long ka jingleh donbor bad ka jingshun. Ka jingleh donbor ka long ka dak jong ka jingshah rem,” la ong u heh ka seng SP.
Haba pynrem ïa ka jingkynnoh ba la thombor ïa u Kejriwal, ka Working President jong ka Nationalist Congress Party, ka Supriya Sule, ka la pynpaw ba ka jingthombor halor ka kam saiñ hima-sima, kam don jaka satia ha India. “Nga da pynrem jur halor ka jingshah thombor jong u Arvind Kejriwal ha ka por ba u don bynta ha ka Padyatra. Ka jingleh donbor ha ka saiñ pyrthei kam don jaka ha India bad ka pynduhjait ïa ka dor jong ka synshar paidbah jong ngi. Ngi dei ban pynthikna ban pynïoh ïa ka jingshngaiñ jong baroh ki nongïalam bad ban kyntait ïa ka jingleh donbor ha ki kam saiñ pyrthei jong ngi,” la ong ka Sule ha ka jingthoh kaba la buh ha ka rynsan X.
U Myntri Rangbah ka Punjab, u Bhagwant Mann, u la ther tyngeh ïa ka seng BJP, da kaba ong ba ka seng, kam lah satia ban ‘shah’ halor ka jingïoh jingkyrshan jong u Kejriwal, na ki paidbah. “Mynta ka sngi, ka BJP ka la pyrshang ban thombor ïa u Arvind Kejriwal na ka kynhun jong ki nongkitkam jong ka. Ka jingkyrshan kaba u Kejriwal u ïoh na ki paidbah ka la pynlong ïa ka BJP ba kam lah ban shah. Ha kaba nyngkong ki la thmu ban pynïap ïa u ha phatok; haba kane kam long kaba jop, ki la pyrshang ban leh ïa u sa da kum kine ki kam thombor,” la ong u Mann.
Ka Atishi, kaba long ka Myntri Rangbah jong ka Delhi, ka la ong ba u Myntri Rangbah barim ka Delhi u lah ban “duh noh ïa la ka jong ka jingim” ha ka jingshah thombor. Ka la kynnoh shuh shuh ba ki pulit ka Delhi kim shym la leh ei ei pyrshah ïa ki nongleh bymman kiba la thombor ïa u heh jong ka seng AAP. “Ha kane ka sngi, ha ka por ba don ka Padayatra ki la don ki nongbud ka BJP kiba la pyrta da ki kyntien ba pyrshah ïa u Arvind Kejriwal bad ki la thombor ïa u. Kaei kaei ka lah ban jia ïa u ha kane ka jingshah thombor. Lada ki don ki tiar ïaleh, u Arvind Kejriwal ruh u lah ban duh ïa ka jingim. Kane ka jingthombor ka la paw shai ba la leh da ka BJP namar ki nongbud jong ka ki la thombor ïa u Arvind Kejriwal kham hashwa ruh. Haduh mynta ki pulit jong ka Delhi kim pat shim khia ban leh ei ei ïa kito kiba thombor ïa u Arvind Kejriwal,” la ong ka Atishi.
