New Delhi, Risaw:
Naba ka jingjaboh ka mariang ha ka nongbah jong ka ri ka nang kiew ha kane ka aïom lehkmen, u Myntri uba dei khmih ïa ka jinglong-jingman jong ka mariang jong ka Delhi, u Gopal Rai, u la pynlong ïa ka jingïalap paidbah ba la tip kum ka ‘Diya Jalao, Patake Nahi’ ha ka Lah Sngi U Blei, ha kaba u la kyntu ïa ki briew ba kim dei ban thang bad pynbthei ïa ki bom pataka khnang ban khanglad ïa ka jingjaboh.
Kane ka jingkyntu ka long shi bynta ban pynduna ïa ka jingkiew palat jong ka jingjaboh ha kine ki 15 sngi ban wan. “Kumba la batai da ki ‘riew shemphang kiba dei khmih halor ka mariang, la ong ba namar ka jingkylla ka suiñbneng ka don ka jingma ba ka jingjaboh ka lyer kan kiew ha kine ki 15 sngi ban wan. Haba peit ïa kane, ka jingpyrkhat jong ngi ka long kumno ban tehlakam ïa ka jingthang ïa ki bom pataka ha ka sngi lehkmen Diwali.
Ban tehlakam ïa ka jingjaboh, ngi pynlong ïa ka jingïalap paidbah ka ‘Diya Jalao’ haduh ka janmiet jong ka Lah Sngi U Blei,” la ong u Myntri ha ka jingïakren bad ki nongthoh khubor. Ha ka jingpyrshang ban tehlakam ïa ka jingjaboh, u Rai u la kdew ba ka sorkar ka pyntreikam ïa ki lad ki lynti ban pynthikna ba yn shah ban rung tang ïa ki kali kiba ïaid lyngba ka nongbah Delhi.
U Myntri u la leit ruh ban ïakynduh ïa u Lieutenant Governor u Vinai Kumar Saxena, ha kaba u la kyntu ban pyntreikam da kaba tyngeh halor ka jingkhang ïa ki bom pataka ha Delhi. Ha ka shithi jong u u la kdew ba ïa ki bom pataka la pynpoi tuh sha ka nongbah na ki jylla ba marjan.
“La don ba pyntip sha nga, ba wat lada la khang pyrshah, ïa ki bom pataka la die pathar khlem salia ha ki ïew bapher bapher jong ka Delhi. Ïa kine ki bom pataka la wanrah na kylleng ki bynta khappud kiba pynïasoh ïa ka Delhi sha Haryana bad Uttar Pradesh,” la ong ka shithi.
