Shillong, Naiwieng 01
Ha ka por step phyrngab jong ka Sngi Thohdieng katba ka jaitbynriew ka dang ïohthiah hadien ka miet jong ka jingrakhe Diwali, ka Riiohlang Dhar ka la bunkam ban buh ïa u mawjam uba thymmai na ka bynta ka phutbol ka India ha ka ri Dominican Republic.
Ka Riiohlang, Assistant Referee jong ka FIFA kaba 34 snem ka rta na Meghalaya, ka la pynrung ïa ka lynnong kaba thymmai ha ka histori jong ka phutbol ha ka ri, haba ka la khmih dalade ïa ka jingïakhun semi-final hapdeng ka Spain bad ka England ha ka FIFA U17 Women’s World Cup 2024 ha Dominican Republica kaba ka Spain ka la jop da 3-0 kol.
Ka dei ka jingjop kaba khraw ïa kane ka referee na India, hynrei ka Riiohlang ka la ong: “Nga long kaba donbok ba nga la ïoh ban ai sngewbha Diwali ïa ka phutbol ha India ha ka rukom barit jong nga.”
Ka la ong ruh lehse kam dei ma ka ban put la ka jong ka turoi bad ban kren shaphang ka jingtrei shitom kaba la pynlong ïa ka ban ïoh ïa ki saw tylli ki jingïalehkai ha ka lympung ïalehkai U17 Women’s World Cup kaba dang ïaid shakhmat.
Ka Kong Riiohlang ka ïadon ryngkat ha ka kynhun kiba don lai ngut ki dkhot, ka Referee Asaka Koizumi na Japan bad ka Assistant Referee Amal Badhafari na UAE, kiba dei napdeng ki nongpeitngor kiba bunkam bha ha ka FIFA U17 Women’s World Cup 2024 jong kane ka kynti.
“Nga sngewkmen ba nga la lah ban leh saw tylli ki jingïalehkai kiba kongsan”, la ong ka Riiohlang, kaba trei ruh bad ki pulit ka Meghalaya. “Ha ka jingïakhun ha ki kynhun, ngi la sdang da ka Spain pyrshah ïa ka USA bad nangta sa ka kynhun nongpdiang,ka jingïalehkai jong ka Dominican Republic pyrshah ïa ka New Zealand.
“Nga lah ban pynsngewtynnad, lehse hadien ka jingïakhun ha ki kynhun, la bat ïa ngi bad shaniah ïa ngi ïa kawei ka jingïalehkai quarter-final (Nigeria pyrshah ïa ka USA) bad ka jingïalehkai semi-final. Ki lai ngut ki Referee Assessor jong ka FIFA ki dei na Spain bad Sweden. Nga ngeit ba ki la sngewhun ïa ka kam kaba nga la leh ha madan,” ong ka Riiohlang.
Hadien ba la poi ha ka nongbah jong ka Dominican Republic, ka Kong Riiohlang ka lah ban thiah tang lai kynta namar ba ka hap ban pyntip na ka bynta ka jingkilan met na ka bynta ka jingïalehkai ka Spain pyrshah ïa ka USA. Hynrei kam don jingujor eiei. “Nga wan phai sha la ïing bad nga la shemphang shi katdei ha ki bun ki liang”, ka la ong.
Ha ka jingïalehkai FIFA U17 Women’s World Cup, la pyndonkam da ka Video Football Support (VFS) system), kaba syriem kum ka VAR.
