Mawkyrwat, Naiwieng 01
Ka Ïatylli FC ka la lah ban pynliem noh ïa ka Mawsynrap SC da 3-2 kol na ka bynta ban rung sha ka quarter final ha ka Golden Jubilee Celebration Football Tournament 2024 ba la pynïaid da ka Nonglang SC ha ka Sngi Palei ha madan Pyndenïew Lyngdoh, South West Khasi Hills District.
Haba phai sha katei ka jingïalehkai ka long kaba itynnad bha. Ha ka kylla step la ïoh ban thep kol nyngkong da ka Mawsynrap lyngba ka kol kaba itynnad (bicycle kick) ba la shut da u Pilasbun Ïawsai ha ka minit ba 15, hynrei tang hapdeng khyndiat minit ka Ïatylli FC ka la pynïakhaid lyngba u Lastborn Marweiñ ha ka minit ba 26.
Haba bteng ïa ka jingïalehkai, u Pilasbun u la thep biang ïa ka kol ba ar ha ka minit ba 34, hynrei ka Ïatylli ka la pynïakhaid biang lyngba ka penalty ba la shut da u Bah Oversharp Ïawphniaw ha ka minit ba 40 bad haduh bakut ka kylla step ki la ïakhaid mar 2-2 kol.
Ka jingïalehkai ka long kaba ïakhaid bha ha ka kylla miet ha kaba baroh ar tylli ki kynhun kim shym la lah ban pynkhih jar ban ïoh ïa nam tam. Hynrei dei ha ka minit kaba 81 ba ka Ïatylli ka la ïoh ban thep ïa ka kol ba lai lyngba u Firstborn Ïawphniaw bad lyngba katei ka kol ka Ïatylli ka la pynthikna ïalade ban rung sha ka quarter final.
Ïa ka nam Man of the Match la ïohpdiang da u Lastborn Marweiñ jong ka Ïatylli FC bad ïa katei ka khusnam la sam da u Bah Bryan Nongsiej.
Ha kajuh ka por ka Nonglang Sports Club ha katei ka juh ka sngi, ka la ïoh ruh ban pynkup burom ïa u Bah Aiboklang Paul Wanñiang uba dei u khun jong u Bah Polycarpus Marweiñ bad Kong Therina Wanñiang, uba la wanrah nam bad burom ïa ka shnong ka thaw bad ka dong ka thaiñ da kaba khur ïa ka takma ksiar bad rupa ha ka Asian International Arm Wrestling Cup 2024 ba dang shu long shen ha Mumbai .
