Ranchi, Naiwieng:
Kum shi bynta ban kynthoh jur ïa ka kynhun synrop ba la lamkhmat da ka seng JMM ba la ïalam da u Hemant Soren namar ba ka la “ai ding halor ki kam jong ki lehnoh Naxal” u Myntri ka tnat ki kam pohïing jong ka sorkar kmie u Amit Shah ha ka Sngi U Blei u la pynskhem da kaba ong ba ka sorkar kmie ba la ïalam da u Myntri Rangbahduh u Narendra Modi kan pynduh noh ïa ka jingma na khmat ka ri hapoh u bnai Lber jong u snem 2026.
U Amit Shah u la pynpaw ïa ka jingsngewskhem ba ka kynhun NDA kan thaw ïa ka sorkar ha Jharkhand, da kaba kam ba kan jop ym duna ïa ka 52 na ki 81 tylli ki Assembly konstitwensi katkum ka jingkheiñ na ka ilekshon Lok Sabha kaba la dep ban pynlong shen.
“Ka la dei ka por ban weng noh ïa ka sorkar u Hemant kaba pyrshah ïa ki Dalit, kiba pyrshah ïa ki riewlum, kiba duk, bad kiba pyrshah ïa ki samla na Jharkhand, kaba pynmih ïa ki kam pyntriem jong ki lehnoh Naxal tang na i jingmyntoi iba rit ha ka saiñ pyrthei.
“Ngi la weng noh ïa ka jingma na Jharkhand ha kine ki san snem ba la dep, bad mynta ka sorkar kmie ba la ïalam da u Myntri Rangbahduh u Modi kan pynduh jait ïa ki kam pyntriem jong ki Naxal na India ha u bnai Lber, jong u snem 2026.”
Haba kynnoh ba ka sorkar u Soren ka bam ïa ka pisa kaba la thmu na ka bynta ki baduk bad ki riewlum, u la ong ba ka BJP shisien ba ka la jied ïa ka bor kan buh ïa baroh ki nongïalam ba bamsap jong ka Jharkhand sha lyndet jong ki kynroh.
“Ka kynhun NDA kan jop ha ki 52 tylli ki konstitwensi na ki 81 tylli ha Jharkhand haba kheiñ ba ki briew ki thep vote da 47 percent sha ka kynhun synrop ha Jharkhand ha ka ilekshon Lok Sabha ba dang shen,” la ong u Amit Shah.
U la ong ba ki briew jong ka Jharkhand ki ai 9 na 14 tylli ki Parliamentary konstitwensi sha ka kynhun NDA, ha kaba baroh 80 lak ki vote la thep kum ka jingkyrshan ïa ka kynhun synrop.
Ka ilekshon Assembly ban jied ïa ki 81 ngut ki dkhot ha ka jylla kan long ha ki ar bynta ha ka 13 tarik, Naiwieng bad ka 20 tarik, Naiwieng bad ka jingñiew ïa ki vote kan sa long ha ka 23 tarik, Naiwieng.
