Shillong, Naiwieng 06
Ka Khasi Students’ Union(KSU) Laitumkhrah Unit kan pynlong ïa ka rynsan ïakura ne ka ‘Maitshaphrang Fight Night Season-2’ na ka bynta ki samla ka jaitbynriew ha ka 9 tarik mynta u bnai ha St. Anthony’s School Basketball Court naduh ka por 3 baje janmiet.
Haba pynpaw ha ki lad pathai khubor ha ka sngi Balang, u Bah Sambormi Lyngdoh, President KSU Laitumkhrah Unit u la ong ba ka thong ban pynlong ïa kane ka rynsan ka long ban pynshlur ïa ki samla ka jaitbynriew ba kin mih shakhmat ban pyni ïa ka sap ka phong jong ki khnang ba kin lait bad kiar na ki jait jingdih pynbuaid bapher-bapher khamtam ha kum kane ka por ba ki samla ki ngop ha ka jingkyrni ban dih ïa u drok.
“Ka thong jong ngi ban pynlong ïa kum kine jait jingïalehkai ka long ba ngi kwah ban pyni bad pynpaw sha ki samla ba ngi dei ka seng kaba pynrem ïa u drok bad ïa kiwei-kiwei ki jait jingdih pynbuaid kiba lah ban ktah ïa ki samla kynthei bad shynrang jong ngi ha ka lynti ïaid jong ki kum ki samla”, la ong u Bah Sambormi.
U la ong ba kum kine ki jait rynsan ki kyntiew ruh ïa ki samla ka Jylla ba kin mih shakhmat ha ryngkat ka jingdon ruh ïa ka jingbeit ha ka jingim jong ki.
U Bah Samborni u la ong ba kin sa don 30 ngut ki kynthei bad shynrang na ki jaka ïalehkai kilan met ne ‘Gym’ bapher-bapher ki ban sa ïakob ha katei ka rynsan ïakob bad ki nongjop ha katei ka rynsan kin sa ïoh ban khur ïa ka takmsa ha ryngkat ka song pisa. U la ïathuh ruh ba ki nongshah khot sngewbha ha katei ka sngi ki kynthup ïa u samla Johnny Nongrum, Anthony Syiem, Daniel Darlong nalor kiwei-kiwei ki riew ïakura bapawkhmat ka Jylla kiba la leit ban ïakhun ha ki rynsan baheh bad bapawnam.
U la ong ruh ba ki nongjop ha katei ka rynsan kin ïoh ïa ki jingai sngewbha kum ki taksa, ka syrnod bad ka song pisa.
Na ka liang ka seng ka wer bad khot sngewbha ruh ïa baroh ki paidbah ban wan peitkai ha katei ka sngi bad ki paidbah nongpeitkai kim donkam satia ban siew ïa kano-kano ka bairung ha katei ka sngi.
