Bengaluru, Naiwieng:
U MP jong ka seng BJP u Tejasvi Surya bad ki Editor jong katto-katne tylli ki kotkhubor Kannada ki la shah kem halor ka jingkynnoh ba ki la pynsaphriang ïa ki khubor lamler kiba pynïadei ïa ka jingpynïap ïalade jong u nongrep ha ka jingïaknieh jaka bad ka Waqf Board, la ong ki pulit hynnin ka sngi.
Haba ïasam ïa ka jingthoh jong ki lad pathai khubor ha ka rynsan ‘X’, u MP ka Bengaluru South ha ka 7 tarik Naiwieng, u la kynnoh ba uwei u nong-rep ha Haveri distrik u la khlad noh da kaba pynïap ïalade hadien ba u la lap ba ïa ka jaka jong u la shim noh da ka Board.
“Ha ka jingkloi jong ki ban pynhun ïa ki jaidbynriew rit paid, u Myntri Rangbah jong ka jylla Karnataka u Siddaramaiah bad u BZ ZameerAhmed K ki la pynmih ïa ki jingthoh kiba don jingktah kiba shyrkhei ha Karnataka kiba la nang long ki bym lah ban teh lakam katba nang mih ki sngi,” la kynnoh u Surya.
Ïa kane ka post la weng noh da u MP hadien ba u heh pulit jong ka Haveri u la khot ïa kane ka khubor kum ka khubor thok.
“Ka khubor ba la saphriang ka long kaba bakla. Ym shym la don kum kata ka jingjia. Kumba la kdew hangne, la ong ba u Rudrappa Channappa Balikai u la pynïap hi ïalade ha ka 6 tarik, Kyllalyngkot, 2022 bad la ïoh jingtip ba kane ka la jia namar ka ram bad ka jingduhnong jong u ha ki mar rep,” la ong u SP. La buh da ka jingmudui mukotduma katkum ka 174 CrPC ha thanat Adar bad la dep ban aiti ïa ka kaiphot ba khatduh, u la ong.
“Da kaba pynshong nongrim halor ka jingujor jong uwei u heh pulit uba la buh ha ka Social Media Monitoring Cell jong ki pulit ka Haveri distrik, la buh jingmukotduma pyrshah ïa u Tejasvi Surya, ki editor jong ka Kannada Dunia e-paper bad Kannada News e-paper katkum ka kyndon 353 (2) ( ka jingshna, jingpynmih, lane pynsaphriang ïa ki jingkren kiba thmu ban pynmih ne pynjur ïa ki jingsngew jong ka jingshun, ka jingsniew, lane ka jingshun hapdeng ki kynhun bapher bapher) jong ka Bharatiya Nyaya Sanhita (BNS),” ong uwei u heh pulit.
Ïa kane ka jingmudui la buh ha CEN (Cybercrime, Economic Offences, Narcotics) Police Station ha Haveri distrik, u la bynrap.
