Mumbai, Naiwieng:
Ka Mumbai Crime Branch, ka la kem biang sa ar ngut ki nongshong shnong jong ka Pune ha ka miet jong ka sngi Balang halor ka jingkynnoh ba ki donkti ban pynïap ïa u heh nongïalam jong ka seng NCP, u Baba Siddique, ha Bandra East.
Ïa kine ar ngut kiba la shah kynnoh la kem na Pune bad la ïalam sha Mumbai hadien ba la kynnoh ba ki la shah pynshisha ba ki la donkti ha ka jingjia katkum ka jingtohkit, ong ki heh pulit.
Da kane ka jingkem kaba dang shen, baroh kiba shah kem ha kame ka kam, ki la poi sha ka 18 ngut.
Kiba la shah kem, ki dei kiba la tip kyrteng kum u Aditya Raju Gulankar, 22 snem ka rta bad u Rafik Niyaz Shaikh, 22 snem ka rta, kine baroh arngut ki dei ki nongshong shnong jong ka Karve Nagar ha Pune.
Ha ka jingtohkit ki la pynpaw ba ki don ka jingïadei kam bad arngut kiwei pat kiba la shah kynnoh donkti ha ka jingjia kiba la shah kem hashwa kiba kynthup ïa u Pravin Lonkar bad u Rupesh Mohol.
U Lonkar bad u Mohol, ki la shah kynnoh ba ki la aiti ïa kawei ka pistol 9mm bad katto katne tylli ki kuli sha u Gulankar bad u Shaikh, kiba la thmu ban pyndonkam ha katei ka kam runar, ong uwei u heh pulit.
Ki pulit ki la ïoh kurup ïa katei ka suloi 9mm bad dang pyrshang ban wad bad kurup ïa ki tiar siat kiba dang sah, la ong u Deputy Commissioner of Police u Datta Nalawade jong ka Crime Branch.
Ka jingkem ïa kiba shah kynnoh kaba dang shen, ka dei halor ka jingphla jong uwei pat uba la shah kynnoh donkti ha ka jingjia u Gaurav Vilash Apune, uba 23 snem ka rta, uba la shah kem ha ka sngi Ba-ar na Pune, bad uba dei ruh u nongshong shnong jong ka Karve Nagar.
U Apune u dei u briew uba donkam tam ha ka jingkem ïa u namar ba u don ka jingïadei kam kaba markhmat bad u Shubham Lonkar bad uwei pat uba la shah kem u Ram Kanoujia, bad u dei ruh shi bynta kum u nongïasuhbuit ban pynïap ïa u Myntri barim ka Maharashtra.
Ha ka jingtohkit, la lap ba la pynthikna ba u Apune un ïoh ïa ka pisa kaba T. 25 lak, ka Flat bad ka kali kum ka jingsiew kylliang na ka bynta ka jingpynïap jong u ïa u nongïalam ka seng NCP.
U la shah hikai pyntbit na ka bynta ban pyndonkam ïa ki tiar siat da kiba la shah kynnoh kiba la phet krad.
Katkum ka jingpynshisha jong ki pulit, la ong ba u la nang ban siat kuli kum shi bynta jong ka jingshah hikai pyntbit.
U Baba Siddique, uba la 66 snem ka rta, u la shah siat ïap ha ki lai ngut ki riew kieng atiar ha ka 12 tarik u Risaw.
U para jong u runar uba dang shah set patok u Lawrence Bishnoi, u Anmol u la shah kynnoh ba u la donkti sha lyndet ka jingjia jong ka kam pynïap briew, hynrei ym pat lah ban pynthikna da ki pulit halor kane.
