Chennai, Naiwieng:
Shiphew sngi hadien ka jingpynbna jong u khlur ak phlim bad u riewsaiñ pyrthei u Vijay ha kaba ïadei bad ka jingthaw ïa ka sorkar synrop ha ka ilekshon sha ka Ïingdorbar Thawaiñ ha u snem 2026, kaba la pynmih ïa ka jingïakynad shaphang ki jingkylla kiba lah ban mih ha ki jingïatylli ha ki kynhun jong ka DMK bad AIADMK bad mano ban ïalam ïa ka kynhun synrop ha kum kane ka por, ka seng jong u ka Tamilaga Vettri Kazhagam (TVK) ha ka Sngi Balang ka la pynshai ba kano-kano ka jingïateh lok na ka bynta ka ilekshon yn ïalam tang da ka seng TVK.
Ki tyllong khubor jong ka seng ki la pynthikna ruh ba u Vijay un leit sha ka prokram jong ka jingpyllait paidbah ïa ka kot ha ka 6 tarik, Nohprah ha kaba la khmih lynti ba u heh ka VCK u Thol Thirumavalavan bad kiba bun ngut kiwei pat kin ïashim bynta.
U Deputy General Secretary jong ka VCK, u Aadhav Arjuna, uba dei u nongpynmih ïa ka kot halor ki nongrim jong u BR Ambedkar, un pynlong ïa katei ka jingïalang.
Ha kaba ïadei bad ka jingkhlaiñ bor jong ka seng ha ka kam ilekshon jong ka TVK, kaba la ïoh ban pynrung kyrteng pura kum ka seng saiñ pyrthei tang ha u bnai Nailur, kam pat shah tynjuh haduh mynta ha kano-kano ka ilekshon, ki kyrtong kiba la ïoh jingkyrshan ïa kaba la ai da ka All-India Thalapathy Vijay Makkal Iyakkam (AITVMI), u nongmihkhmat jong ka TVK, ki la jop da 129 tylli ki konstitwensi ha ka ilekshon Local Body 2021.
Kaba kham pawnam ka long ba ka TVK ka dang don ha ka jingpynkhreh ban thung ïa ki nongkitkam na ka bynta baroh ki kam jong ka seng ha ka kyrdan jong ka jylla bad ka distrik. Uwei u heh ophisar u la ïathuh ha ki lad pathai khubor ba tang kito ki seng kiba kloi ban pdiang ïa ka jinglong nongïalam jong ka TVK ki lah ban ïatreilang bad ka seng namar ba ka TVK kan ym shim ïa ka bynta kaba hapoh kano-kano ka kynhun synrop.
“Ha ka por ba don ka jingïalang banyngkong, u nongïalam jong ngi (Vijay) u la pynpaw ka jingkyrmen ba ka seng kan la sa lah ban pynïoh ïa ka jingbun paid dalade ban thaw ïa ka sorkar. Hynrei wat hapdeng kane (ka jingbun paid jong ngi hi), ngi kloi ban ïasam ïa ka bor synshar bad ki seng ba la ïatreilang kiba kyrshan ïa ngi. Ïa ka jingïateh lok, la hap bah-khlieh da ka seng TVK”, u la ong.
U la kdew shuh shuh ba yn sa pynbna shen ïa ki nongkitkam ha ka kyrdan jong ka jylla bad distrik.
U nongtrei u la kyntait ruh ïa ki khubor shaphang ka jingpynbna jong ka jingpyllait ïa ka lad pathai khubor kaba thymmai ba la tip kum ka ‘Vaagai’, da kaba bynrap ba ka seng kam pat ai kano-kano ka aplikeshon ban plie ïa ka lad pathai khubor kaba thymmai.
Wat la ka ilekshon sha ka ïingdorbar thawaiñ ka dang sah sa kumba 17 bnai, hynrei ka jingïakren ïatehlok hapdeng ki seng bapher bapher ka la sdang hadien ka jingïalang jong ka TVK ha ka 27 tarik, Risaw hajan Vikravandi, kaba la khring da ki hajar ngut ki nongkyrshan.
U Myntri Rangbah ka jylla u M K Stalin bad u Udhayanidhi Stalin, Symbud Myntri Rangbah, ki la pynpaw biang ba ïa ka DMK kaba synshar, yn jied biang ha ka bor ha u snem 2026.
La ngeit ruh ba ka AIADMK, ka la bthah ïa ki dkhot jong ka, ba kin kiar na kaba kynthoh ïa baroh ki seng saiñ pyrthei, lait noh tang ka DMK bad ka BJP.
Haba pdiang sngewbha ïa ka jingrung jong u Vijay sha ka saiñ hima-sima, u Vice President ka BJP ka jylla u K P Ramalingam u la ong ba ka seng jong u kam kheiñ ïa u Vijay ne ïa ka TVK kum ki nongshun ha ka kam saiñ hima-sima.
Kane ka jingïoh jingkyrshan jong ka seng kan sa long ka lad ban nang pynkhlaiñ shuh shuh ïa ki jingtreikam jong ka seng khamtam ha ki sngi ban wan bad ban khring ïa kiba bun ki kynhun seng bad ki riewshimet ban leit pynïasoh bad ka seng bad ban ai mynsiem ïa ki nongïalam ka seng.
“Ngi kwah eh ba un ïasnohktilang bad ngi ha ka jingïakhun pyrshah ïa ka bamsap. Ngi dei ka seng kaba don da ki klur ki dkhot ha kylleng ka ri kaba ïaleh ban thaw ïa ka imlang-sahlang kaba lait na ka bamsap, ka jingshah lehbeiñ ha ka niam bad kiwei kiwei ki jingïapher. Ka DMK ka dei ka nongshun ba kongsan kaba ka TVK ka dei ban pynleit jingmut bha,” u la ong ha ki nongthoh khubor shabar ka Dharmapuri Combined Court Complex.
