Amlarem, Naiwieng 12
Ka lympung ïalehkai Super League bad Lower Division Football Tournament ba la pynïaid da ka Amlarem Sub Divisional Sports Association (ASSA) ka ïaid shaid shaid ha madan Mini Stadium Lajaplem, Amlarem kaba long ha ka Sngi Ba-ar.
Ha ka jingïalehkai jong ka Lower Division hapdeng ka Krangpamtadong SC bad Ammutong Pyrshang, ka jingïalehkai ka la kut da ka jingïakhaid khlem don ba thep kol.
Ha ka jingïalehkai kaba bud, ka Nongtalang Chnongthmai ka la ïoh jingjop da kaba pynliem ïa ka TSC Jong U Chen da 1-0 kol. Ïa kane ka kol jong ka Nongtalang Chnongthmai la thep da u Mahrhen Lyngdoh ha ka minit kaba 11.
Ha kawei pat ka jingïalehkai hapdeng ka Amlari Model bad Amsalang SC ka la kut da ka jingïakhaid mar 1-1 kol. Ïa ka kol jong ka Amasalang SC la thep da u Mebanklet Tariang ha ka minit kaba 7, katba ïa ka kol jong ka Amlari Model la thep da u Mehi Pala ha ka minit kaba 10.
Haba phai sha ka jingïalehkai Super League ruh ka jingïakhun ka la kut da ka jingïakhaid mar 1-1 kol hapdeng ka Dongmihsngi Mupyut bad Lumpynngad SC. Ïa ka kol jong ka Lumpynngad SC la thep da u Domi Surong ha ka minit 19 bad ïa ka kol jong ka Dongmihsngi Mupyut la thep da u Elas Phawa ha ka minit ka ba 36.
