New Delhi, Naiwieng:
Kiba bun tylli ki liengsuiñ jong ka IndiGo kiba wan her bad mih na Delhi bad Amritsar ki la hap sangeh treikam ha kum kane ka por ba dang jur ka jingjaboh jong ka lyer bad ka jingrben ka jinglynguh tdem jaboh kaba tap ïa ki nongbah.
Kawei ka liengsuiñ jong ka IndiGo na Punjab ban leit sha Delhi ha ka miet jong ka Sngi Ba-ar ka la shah pynsangeh noh, katba bun tylli kiwei pat ki la hap ban mih slem ha ka sngi Ba-ar bad ka sngi Balang namar ka jingbym ïohi bha.
Ka IndiGo ka la ong ha ka jingpynbna halor ka rynsan X, “Namar ka jinglong ka suiñbneng kaba sniew, ki liengsuiñ ban leit/na Amritsar mynta ki dang shah ktah jur. Ngi sngewthuh ïa ka jingdonkam jong ki jingthmu leit jingleit jong phi bad ngi kwah ban pynthikna ba phin ïoh ïa ki jingtip ba pura.”
Ki liengsuiñ hapdeng ka Delhi bad Amritsar ha ka step jong ka sngi Ba-ar bad ka sngi Balang ki la sahteng palat ar kynta namar ka jingduna bha ka jingïohi hapdeng ka por ba ka AQI kaba shyrkhei ha baroh ar tylli ki nongbah. Ki liengsuiñ kiba la buh ban kiew ha ka por 6 baje mynstep khatduh ki la kiew haduh ka por 8 baje jong ka step sngi Balang.
Ka liengsuiñ IndiGo kaba mih na ka kad liengsuiñ IGI jong ka Delhi ban leit sha Amritsar, kaba dei ban kiew ha ka por 8 baje mynmiet jong ka sngi Ba-ar, ka la shah pynsangeh noh namar ka jingduna ka jingïohi.
Ka liengsuiñ kaba la buh ban her na Amritsar ban leit sha Delhi ruh ka la shah pynsangeh noh shwa ha ka por 11 baje mynstep.
Ha ka sngi Balang, ka liengsuiñ kaba mih na Delhi Airport’s Terminal 3 ban leit sha Amritsar Airport, kaba dei ban her ha ka por 5:45 baje mynstep, ruh ka la shah pynsangeh noh hadien ba ka la sahkut palat ar kynta namar ka jingduna ka jingïohi na ka daw ka jinglynguh tdem. U Vice President u Jagdeep Dhankhar um shym la lah ban leit sha ka jingïalang ha Ludhiana, Punjab namar ba ka liengsuiñ jong u kam shym la lah ban hiar ryngkew ha ka kad liengsuiñ jong ka Halwara hangne namar ka jingbym lah ban ïohi bha ha ka sngi Ba-ar.
Ka liengsuiñ jong u, ka la hiar ryngkew ha ka kad liengsuiñ jong ka Amritsar, shuwa ba un leit sha Madhya Pradesh, ban ïashim bynta ha kawei pat ka prokram.
Ka Amritsar Deputy Commissioner ka Sakshi Sahwney ka la ïathuh ba ka liengsuiñ jong u Vice Vresident ka la hiar ha ka kad liengsuiñ ha Amritsar ha kaba u la sah haduh 40 minit shwa ba yn pynsangeh noh ïa ka jingwan mih khmat jong u ha katei ka jingïalang ha Ludhiana.
Ka jinglong ka suiñbneng ha Punjab bad Haryana ka la hiar sha ka jinglong kaba sniew bha, katba ki jaka ha Delhi ki la sakhi ïa ka jinglong ka suiñbneng kaba la hiar sha ka kyrdan kaba jur bad kaba don jingma shibun ha ka step jong ka sngi Balang.
Ka jingthang ïa ki ñiut ban pynlong sboh ïa ki lyngkha ha Punjab bad Haryana hadien ba la dep ot ïa u kba ha u bnai Risaw bad Naiwieng ka long bunsien ka jingkynnoh ba ka dei ka daw ban pynjur ïa ka jingjaboh jong ka lyer ha Delhi.
