Kolkata, Naiwieng:
Naba la sakhi, ïa ka jingbym treikam ka hukum ba la buh ha kaba ïadei bad ka jingthmu ban tehlakam ïa ka jingjyllei jong ki kam khaïi beaiñ da kaba pynshitom ïa kito ki heh ba dei khmih ne ki pulit ki bym lah ban leh ei ei halor kane ka bynta, ka Bombay High Court ha Goa ka la pynpaw ïa ka jingbitar bad kynthoh jur ïa ki heh ba dei khmih.
Halor ka jingbym lah jong ki ban pynduh pyndam ïa ka jingdon jong ki kam beain ha kaba ïadei bad ka jingtih beaiñ ïa u shyiap bad la hukum ïa ki pulit kiba dei ban khmih bniah, kiba dei ban kurup, ban pynsangeh treikam bad ban khmih bniah ïa ki trok kiba dei ban kit ïa u shyiap.
“Wat lada la don kiba bun ki hukum, ki jingpyntreikam beain ha kaba ïadei bad ka jingtih beaiñ ïa ki marpoh khyndew… ki heh ba dei khmih kiba dei ban don bynta ha ka ban tehlakam ïa kine baroh, kum ju pynpaw ba ki shimkhia ïa ka kam ha kaba ïadei bad ki hukum ba ngi la buh na ka por sha ka por.
Katkum ka jingiohi jong ngi, la ong ba ki briew kiba la donkti ha ka ban leh ïa kitei ki kam beaiñ ki ju leh da ki buit kumno ban lait na ka kti jong ki bor ka aiñ. Ha kum kine ki bynta, ngi shem ba ha kiba bun na kum kine ki jingjia wat ki heh ba dei khmih ki pyni ba ki la pynkhreh lypa ban shah pynthame ne ban shah pynbiej ha kiba bun rukom katkum ka jingleh khlieh jong kitei ki nongleh beaiñ.
