New Delhi, Naiwieng:
U Myntri ka tnat kam bar ri jong ka India- u Randhir Jaiswal u la ong ba u Myntri Rangbahduh ka India- u Narendra Modi, u la ong ba ka jingkynnoh jong ka Canada ia ka India halor ka jingdon kti ban pyniap ia u Hardeep Singh Nijjar ka long tang ka jingpynbud nam ia ka ri India.
Namar ki tnat syntiat jong ka Canada ki la kynnoh ba ka u Modi u la ialeh ban buhrieh katba lah haba iadei bad ka jingiadon kti jong ka India ban leit pyniap ia utei u lehnoh uba phet na India sha Canada bad uba la long u trai shnong jong ka ri Canada ha ka por ba u shah pyniap.
Kumta, utei u Myntri ka tnat ïada jong ka ri India u la ong ba ka Canada ka la shu pharep tang ban ioh pynbud nam ia ka ri India bad kam poi pyrkhat pat ba ki jingiadei kam jong ka Canada bad ka India kin shu pulom ei noh khlem da poi shaei-shaei ruh bad baroh ki jingiadei kam khamtam haba iadei bad ka khaii- pateng bad ka India, ka Canada ka la shu duh jingmyntoi ei.
Namar la ong ba u Hardeep Singh Nijjar u la shah pyniap hapoh Vancouver ha u bnai Jylliew jong u snem 2023 ba la leit, ha kaba ka Canada ka la pharep beit-beit ia ka India ba dei ka jingsuhbuit jong ka India ban leit thombor bad pyniap ia utei u nongshong shnong ka Canada hapoh u pud- u sam jong ka ri Canada khlem ka jingai jingtip ne ka jingiatrei lang bad ki bor pynïaid ka Canada.
Dang ha une u bnai ba la lah ruh, ka Canada ka la pharep don kti bad pynrung ia ki katto katne ki heh ka India hapoh ka thup jong kiba don kti ha katei ka jingpyniap ia utei u lehnoh kynthup ia u Sanjay Verma bad kiwei de ki heh.
