Bertina Lyngdoh
Ka tamasa ka dei ka jingrakhe kaba wanrah lang ïa baroh ha ka jingïatylli ban rakhe lane ban leh kmen ïa ki jingrakhe kiba kum ka kolshor, ka niam, ne ki jingngeit blei, ka tynrai jong ki jaitbynriew bad kumta ter ter. Ki tamasa ki dei ki por ka jingkmen jingsngew-bha. Ki dei ruh kum kita ki atiar kiba pynklet ïa u briew ïa ki jingshem jingsngewsih jong ki. Ki don ki tamasa kiba dei jong ka ri, jong ka jaitbynriew, ki don pat kiba dei jong kiwei ki bynta ka ri ïa kaba la ju rakhe bad leh kmen. Ban shu ong ki tamasa ki long kum ka dawai ban pynkhiah shipor ïa u briew na ki jingmong jingpang ne ki jingsngewsih jong ki. Te namarkata, ngi donkam ïa ki tamasa naba ki long ki shibynta jong man u briew.
Ka ri khasi jong ngi ka long ka ri kyrpang ka ri ba la kyrkhu na ki jylla ha ka ri India jong ngi. Lada kum ka Shad Nongkrem, Ka Behdienkhlam, Ka Wangala Dance, ïa kiba ki long katto-katne ki tamasa tynrai ka ri Khasi Jaiñtia, Garo, kumjuh kiwei ki jylla ne ki ri ki don ïa la ki jong ki tamasa tynrai jong ki. Ki tamasa tynrai ha ka jingshisha, ki dei ban pynneh pynsah ïa la ka riti ka dustur ki trai ri trai muluk. Hynrei namar ka jingkylla ka por, bun ngi la kham klet noh ban pynshong nongrim lane ban pynneh pynsah ïa la ki tamasa tynrai. Ki tamasa ki long ha ka jingshisha ban pynjah jingkhuslai i’u briew ym ban sngewthuh bakla ba ki tamasa ki dei ka jinglum pisa. Mynha ki khyndiat sngi bala dep, ka jylla Meghalaya jong ngi ka la rakhe ïa ka tamasa kata ka Cherry Blossom ka bym shim dei ka tamasa tynrai jong ngi. Lada kumta ruh kan pher lei lada kam don kano-kano ka jingktah ïa ka ri khasi jong ngi kiba long ki ritpaid. Sngew bynñiaw pat ban ong, ba ka tamasa Cherry Blossom ïa kaba ka sorkar jylla ka la pynbeit ka la long pynban ka jingpyrshang ban ïalam bakla ïa ki khun sam ka ri khasi jong ngi. Kine ki jingpyrshang ban ïalam bakla ki long ka jingsniew ka pyrthei kiba kum ha ka bam ka dih kaba sniew. Ka tamasa kam lah ban long kita ki ban pynngop ïa ki khun samla ha ki jingsniew. Namar lada kane ka jia, ka pynhiardor ïa ka jinglong tynrai ka jaitbynriew lym ruh ka longrynïeng. Shisien ba la ngop ha ka bam ka dih ba sniew, ka long kaba shitom bha ruh ban kiar na ki.
Namarkata, wat ai ba ki tamasa kin long ka jingïalam bakla ïa ki khun samla, hynrei ai ba kin long kum kata ka atiar ka jingkmen ïa ki. Kynmaw ko khun samla ka ri ba haba ngi leit ban rakhe ïa ki tamasa la ka dei ka tamasa tynrai ne ka jong kiwei, ngi dei ban ri la ka akor ka burom. Ngi dei ruh ban tip bad ri ïa ka akor u khasi khamtam ha ka ktien ka thylliej. Kmen haba dei ban kmen bad ki tamasa, hynrei husiar pat ba ngin ym shah ïalam ha ki jingthala ka pyrthei. Ko khun ka ri to long ki ban ieit ïa la ka ri bad ka jaitbynriew.
