New Delhi, Naiwieng:
Ki dkhot ka liang pyrshah ha kine ki khyndiat sngi ba la leit ki la dawa ban pynjlan ïa ka por treikam jong ka Joint Committee halor ka Waqf Amendment Bill, da kaba kynthoh ba ki donkam por shuh shuh ban pule bniah ïa ki jingpynkylla ha kane ka aiñ ba la buh.
Ha ka jingïalang jong ka kynhun, u Chairman bad u dkhot ka BJP u Jagdambika Pal u la pynbna ba ka jingïalang kaba la dep ban pynlong ha kine ki khyndiat sngi ba la leit, kata ha ka Sngi Palei kan dei ka jingïalang kaba khatduh jong ka kynhun bad shen yn sa sam ban pynbna ïa ka kaiphot ba la thaw lypa sha ki dkhot. Kane ka la wanrah ïa ka jingpyrshah na ki dkhot ka liang pyrshah kiba la pyndonkam da ki jingkynthoh bad don napdeng jong ki kiba la khot ïa u Lamphang ka Lok Sabha u Om Birla bad pan jingïarap na u halor kane ka kam.
La bthah ïa kane ka kynhun da ka Lok Sabha ban aiti ïa ka kaiphot jong ka ha ka sngi ba khatduh jong ka taïew ba la pynlong ïa ka dorbar Tlang ha Parliament kaba la sdang mynta ka sngi. Ka sorkar ka la dep ban buh kyrteng ïa ka Waqf (Amendment) Bill ban bishar bad mynjur ha ka dorbar tlang “hadien ba la wanrah ïa ka kaiphot jong ka kynhun ba ïatreilang ha ka ïingdorbar thawaiñ jong ka Lok Sabha”.
Ha ki por ba la dep ruh, ki dkhot ka liang pyrshah ha katei ka kynhun ki la kynnoh ïa u Pal, uba dei u MP jong ka BJP, ba u leh ïa ka kam jong ka sorkar. Ki la byrngem wat ban pynïakhlad noh ïalade na ka kam jong kane ka kynhun.
