Shillong, Naiwieng 24
U Bah Prestone Tynsong uba dei u President ka National People’s Party (NPP) Meghalaya, u la ong ka jingmih than ki rynsan social media ba laiphew jait ka ïalam bakla ïa ki paidbah.
“Nga kyrpad ïa ki paidbah ba kim dei ban shaniah ïa kiba mih ha ki rynsan social media kum kaba dei lut namar ynda la wad bha ka ïalam pynban sha kaba bakla ha ka rukom pyrkhat”, u la ong.
U la ong ba ha ka ilekshon MP kaba la dep, ki khubor kiba mih ha ki rynsan social media ki long ki bym don nongrim, hynrei ki paidbah ki kylla kulmar jingmut bad ki ngeit pat ïa kum kita.
“Ki paidbah ki dei ban long phikir bha ba kin lait na kine kiei-kiei, la ka long ha kaba ïadei bad ka ilekshon lane ha ki kam shimet, ki dei ban wad jingtip thik-pa-thik khnang ba kano-kano kaba ki leh kin nym babe kylla”, la ong u Bah Prestone uba dei ruh u Symbud Myntri Rangbah ka Jylla.
Ha kajuh ka por u Bah Prestone u la ong ba ka daw bah daw san ba ka NPP ka la shah rem noh ha ki ar tylli ki konstitwensi ha ka ilekshon MP kaba mynta u snem ka dei namar ka jingshah ïalam bakla ki paidbah ban ong ba ka NPP ka dei ka BJP.
“Kane ka la ktah bha ha baroh ar tylli ki konstitwensi, bad ka dei ka ba bakla ban ong ba ka NPP ka dei ka BJP namar ba ngi don la kajong ka nongrim treikam bad rukom pyrkhat”, u la ong.
“Tang namar ba ka BJP ka khlem buh kyrtong ha katei ka ilekshon bad namar ba ka NPP ka don lang ha ka Sorakr NDA ha Delhi, ka pynlong ïa ki nongïalam ka BJP ban kyrshan ïa ki kyrtong ka NPP ha kane ka Jylla, katba yn da poi hangne ki pynkylla da kumwei pat. Kata ka dei kawei kaba pynlong ïa ngi ban duh ïa ki seat”, u la ong.
U la ong ba ym lah ban ïanujor ïa ka ilekshon MP ba dang shu dep mynta u snem bad kiwei ki ilekshon lada bishar ïa ka histori kiba la dep.
“Lada nujor ïa ka ilekshon MP ha baroh ar tylli ki Parliamentary konstitwensi, ynnai nujor tang ïa kaba mynta, hynrei lada bishar bniah ïa ki ilekshon MP ba la dep, ha Lyngkerdem ha kato ka por nga jop ha ka ilekshon MLA, katba da poi ha ka ilekshon MP nga rem, teng teng ha ka MDC nga rem katba ha ka MLA pat nga jop”, la ong u Bah Prestone.
