New Delhi, Naiwieng:
Ka General Secretary jong ka Congress ka Priyanka Gandhi Vadra, kaba la jop na Wayanad kaba don ha Kerala, ka la bam smai hynnin ka sngi kum ka MP jong ka Lok Sabha. Ha kane ka sngi kyrpang ka la phong da ka Kerala Kasavu saree, kaba dei ka saree kaba kham kyrpang bha kaba rong makhon bad thoh rong ksiar ha ki mang jong ka, bad kane ka jait saree ka dei kaba ju riam ha ka por ba don ka jingleh kmen Malayali.
Ka Priyanka Gandhi Vadra kaba la 52 snem ka rta bad bat artad ïa ka kot Riti Synshar ka ri ha kti , ka la bam smai ha ka jingïadonlang u Lamphang ka Lok Sabbha u Om Birla bad ki MP jong ka Parliament.
U kurim jong ka, u Robert Vadra lem bad ki khun, bad u heh nongïalam jong ka seng Congress, u Mallikarjun Kharge, ki la don lang ha ka rynsan jong ka Lok Sabha.
Da ka jingrung jong ka Priyanka Gandhi Vadra sha Lok Sabha, ka Parliament mynta ka la don lai ngut ki dkhot na ka longïing ki Gandhi ha ka sien kaba nyngkong hadien bun phew snem.
Katba ka Priyanka Gandhi Vadra bad u Rahul Gandhi kin shong ha Lok Sabha, ka kmie jong ki ka Sonia Gandhi ka don ha Rajya Sabha hadien ba ka la rai ban ym ïakhun na Raebareli konstitwensi ha ka por ba don ka ilekshon Lok Sabha ha u snem 2024.
U Rahul Gandhi, uba la jop na baroh ar tylli ki konstitwensi, kata na Wayanad bad Raebareli, u la jied ban bat ïa ka konstitwensi jong ka longïing jong u bad u la pyllait noh ïa ka Wayanad, hadien kane la pynïakhun ïa ka Priyanka Gandhi Vadra na kane ka konstitwensi kaba lait.
Ka la ïoh 6.22 lak vote, bad ka la pynliem ïa u Sathyan Mokeri, uba ïakhun pyrshah ïa ka na ka seng CPM, da palat 4 lak vote, kaba kham bun ban ïa kaba u Rahul Gandhi, u ïoh jingkyrshan ha ka vote jong u ha ka ilekshon jong u snem 2024.
Hadien kane ka jingjop, ka Priyanka Gandhi Vadra ka la ong ba ka khmih lynti ban long ka sur jong ki paidbah ha Parliament.
“Nga dap da ka jingsngewnguh na ka bynta ka jingshaniah kaba phi la buh ha nga. Ngan pynthikna ba katba nang mih ki sngi, phin sngew shisha ba kane ka jingjop ka la long ka jingjop jong phi bad ka briew kaba phi la jied ban mihkhmat ïa phi ka sngewthuh ïa ki jingkyrmen bad ki jing-angnud jong phi bad ïaleh na ka bynta jong phi kum kawei na ki jong phi nga khmih lynti ban long ka sur jong phi ha Parliament,” ka la thoh ha ka jingpyllait khubor ha ka rynsan X.
U Rahul Gandhi u la ïoh ïa ka jingjop kaba khraw ha Wayanad, ha kaba u la ïoh 6.47 lak vote da ka jingïapher kaba 3.64 lak vote.
U la bat ïa katei ka konstitwensi ar sien ha ka ilekshon 2019 bad 2024. Lait na ka Priyanka Gandhi Vadra, u nongïalam ka Congress u Ravindra Chavan uba la pynliem ïa u nongïakhun pyrshah jong u na ka seng BJP na Nanded ha ka ilekshon shiteng samoi jong ka Lok Sabha kaba la long ha katei ka jaka, u la shim smai ruh kum u MP.
U Robert Vadra, u la pynmih ïa ki dur jong ka Priyanka Gandhi, ha ka facebook bad u la thoh “Khublei shibun.”
Hynrei, U Amit Malviya, uba long u heh jong ka IT cell jong ka BJP, u la kynthoh jur pyrshah ïa ka Priyanka Gandhi, halor ka jingshim smai jong ka.
“U MP bathymmai jong ka Muslim League na Wayanad u shim ïa ka jingsmai. Ka por kaba kmen bad kaba khraw na ka bynta ka longïing ki Gandhi,” u la thoh ha ka twitter jong u.
