New Delhi, Nohprah:
Ka India bad ka Japan mynshem taiew ki la ioh ban pynbeit halor katto-katne ki kam ba iadei bad ka jing-iatrei-lang ban pynkhlaiñ ia ka jingiada jong kitei ki arliang ri khamtam ha kum kine ki por kat shaba phai la iohi tang da ki thma kiba ap ia ka pyrthei baroh kawei.
Ia kitei ki mat la ioh ban iakren hapdeng ka jing-iakynduh markhmat jong u Myntri ka tnat ïada ri ka India- u Rajnath Singh bad u Myntri ka tnat ïada jong ka Japan- u Gen Nakatani hapoh Tientiane jong ka nongbah Laos.
Kumta, la ong ba baroh arliang ri ki la mynjur ban iatrei-lang na ka bynta ka jingshngaiñ bad ka jingpynkhlaiñ ia ka jingiada ia baroh arliang hi nangne sha khmat.
Shuh-shuh ruh la ong ba kine arliang ri ki la mynjur ban iatrei lang ruh ha ka liang khaii-pateng bad ka shalan ia ki tiar ïakhun ban pynkhlaiñ ia ka jingiada ri.
Namarkata, la ong ba u Rajnath bad u Nakatani ki la ioh ban iakren ruh shaphang ka jingdonkam bad ka jing-iadei ba kyrpang hapdeng ka India bad Japan haba iadei bad ka ‘Defence Industry & Technology Co-operation’.
Hadien katei, u Rajnath Singh u la ioh ruh ban shong jingialang bad u Myntri ka tnat ïada jong ka Philipines- u Gilberto Teodoro ban iakren halor ka jing-iatrei lang hapdeng ka India sa bad kane ka ri naba la ong ba ka India ka long kaba kloi ban iadei bad kano-kano ruh ka ri bad ban iatrei-lang na ka bynta ka bha-ka miat bad ban kyntiew ia ka ioh-ka kot bad kumjuh ka jingshngaiñ jong baroh lang.
