Kolkata, Nohprah:
Ka Myntri Rangbah jong ka West Bengal, ka Mamata Banerjee, ha ka Lah Sngi U Blei ka la khot na ka bynta ka kynhun pynneh jingsuk jong ka United Nations ha Bangladesh bad ka la dawa ruh ïa ka jingshimkhia bad ka jingtuklar ba shimet jong u Myntri Rangbahduh ka ri, u Narendra Modi, na ka bynta ban pynthikna ïa ka jingshngaiñ jong ki kynhun niam jaitbynriew rit paid ha ka ri marjan kaba la shah ktah ha ki kam thombor.
Kine ki jingdawa jong ka Banerjee, ki wan ha ka por ba don ki kaiphot kiba la ong ba ki la don ym duna ïa ka lai ngut ki nongïalam niam Hindu- na ka International Society for Krishna Consciousness, kiba la shah kem ha ka jingkulmar paidbah kaba la pynkhihwin ïa ka ri Bangladesh naduh u bnai Nailar ha kaba kane ka jingïakhih kaba la ïalam da ki samla pule, ka la pynbor ïa ka Myntri Rangbahduh ka ri, ka Sheikh Hasina, ba kan hiar shuki noh bad ka kynhun jong ki shipai ka la shimti ïa ka bor, shwa ban buh ïa ka sorkar ba shipor.
“Ngi don ki longïing… ki mar ki mata… bad kiba ïeid ba thoiñ ha Bangladesh. Ngi pdiang ïa kano kano ka nongrim ba ka Sorkar India ka shim halor kane…hynrei ngi pynrem ïa ki kam thombor bad ïuhroit ha kaba ïadei bad ki niam la ka long ha kano kano ka jaka ha ka pyrthei bad ngi kyrpad ïa ka sorkar pdeng, bad u Myntri Rangbahduh, ban shim ka jingtuklar,” ka la ong.
