Bangalore, Nohprah:
Ka tnad Social Work jong ka Kristu Jayanti College Bangalore, Karnataka ka la pynlong ïa ka jinghikai kaba dei halor ka phang “Jinglehkhuid Ïalade Shimet” ban ktik ïa ki jingmut jingpyrkhat jong ki khynnah pule ha ka skul Sree Saraswati Vidyalaya skul dang shen. Ïa kane ka sien jam ban pynsngewthuh ïa ki 47 ngut ki khynnah ba shong klas 8th bad klas 9th ïa ka jingdonkam jong ka jing-lehkhuid jingsuba kaba bha bad ka jingnoh synñiang jong ka sha ka jingkoit jingkhia ba pura.
Ïa kane ka jinghikai la ïalam da ki samla pule Master jong ka Social Work, i samla Jeneepeaceful Iawphniaw, i samla Ann Maria Treesa bad i samla Sebastian Paul. Kane ka jinghikai ka la sdang da kaba pynshai ïa ki khynnah shaphang ka jingmut jong ka Jinglehkhuid Ïalade Shimet.
Ka jingdonkam jong kane ka jingai jinghikai ka long ban ïatreilang ban wanrah ïa ka jing khuid suba naduh ki nongpynïaid ryngkat bad ki khynnah jong kane ka skul.
Ka long kaei kaei ka ba sngewtynnad bad ka ba ai jinghikai kumno ban lehkhuid ïa ka met ka phad ban sait bha ki kti ban lait na kino kino ki jingpang ba bun jait.
Kum ka jingpynkut ïa kane ka prokram ai jinghikai la ïoh ban ai khublei ïa kine ki nongpynïaid da i principal jong kane ka skul i Mr.s Kala bad i ruh i la ïoh ban ai khublei ïa u Dr Jonas Richard uba dei u khlieh jong kane ka Department of Social Work halor ka jinglah ban pynïaid beit ïaid ryntih ïa kane ka jingai jinghikai.
Ki khynnah skul ruh ki la kloi ban ïashim bynta naduh ka basdang bad ki la pyni ruh ïa ka jingsngewtynnad ban nang tip shuh shuh shaphang ka jinglehkhuid ïalade khamtam ha kine ki khynnah basdang khie san kiba la sngewthuh ïa ka jingkordor jong ka jingkhuid jingsuba.
