Shillong, Nohprah 02
Ka Shillong Sports Association (SSA) ka la pynbna ba kan sdang noh ïa ka lympung ïalehkai ki kynthei ba la tip kum ka Women’s Football League 2024 naduh 11 tarik mynta u bnai ha SSA Stadium kaba ha First Ground, Polo.
Ha kane ka lympung kin don 10 tylli ki kynhun kiba la phiah sha ar tylli ki group. Ki kynhun kiba don ha ka Group-A ki long ka Pay For Right Football Academy, Laitkor SC, Madanryting SC, Kharang SC bad ka Mawpat SC, katba ha ka Group-B ki long ka Rangdajied United FC, Lumparing SC, Smit SC, Nongrim Hills SACC bad ka New Challengers.
Ki kynhun ban ïakhun ha katei ka sngi sdang (11 tarik) kin long hapdeng ka PFR pyrshah ïa ka Laitkor SC ha ka por 2 baje nohphai sngi. Ha ka 12 tarik kin don lai tylli ki jingïakhun, ka Rangdajied United pyrshah ïa ka Lumparing ha ka por 10 baje mynstep, kumjuh ka Madankyting ïa ka Kharang ha ka por 12:15 mynsngi bad ka Smit ïa ka Nongrim Hills ha ka por 2:30 nohphai sngi.
Ïa ki jingïakhun semi final la buh ban pynlong ha ka 27 tarik bad ïa ka final yn pynlong ha ka 30 tarik mynta u bnai.
