Shillong, Nohprah 03
Ka Indian Olympic Association (IOA) ka la pynbna paidbah ïa ki tarik bad ki jingïalehkai na ka bynta ka 38th National Games, ka ban pynlong da ka Uttarakhand naduh ka 28 tarik u Kyllalyngkot haduh ka 14 tarik u Rymphang 2025.
Kane ka lympung ïalehkai kan long ka jingplie lad ïa ki nongïalehkai ka ri ba kin pyni ïa ki sap ïalehkai ba kyrpang. Kin don haduh 32 tylli ki jait jingïalehkai lem bad 4 tylli ki jingpyni lane jingbatai (demonstration).
Ka Dr. PT Usha, President ka IOA ka la kynthoh, “Ka National Games kaba 38 ha Uttarakhand ka kular ban long ka jingïalehkai kaba kongsan ha ka ban kyntiew ïa ki jingïalehkai tynrai bad ki jingïalehkai ka juk mynta ha India. Ka jingpynrung ïa ki jingïalehkai kum ka Kalarippayattu, Yogasana, Mallakhamb, bad Rafting ka pynpaw ka jingkular jong ngi ban burom ïa ka pateng ba riewspah jong ka India katba ngi pynshlur ïa ki lad ki lynti na ka bynta ki nongïalehkai. Ka Uttarakhand ka la leh ïa ki jingpyrshang kiba dei ban ïaroh ban pynthikna ïa ki jingdonkam kiba long ïaryngkat kyrdan ha ka pyrthei, bad ngi khmih lynti ïa katei ka lympung ba kan long kaba jop.”
Ki 32 tylli ki jingïalehkai ki kynthup ïa ka Athletics, Aquatics, Archery, Badminton, Basketball, Bowling (Lawn), Boxing, Canoeing & Kayaking, Cycling, Fencing, Football, Golf, Gymnastics, Handball (Indoor & Beach), Hockey, Judo, Kabaddi (Indoor & Beach), Kho Kho, Modern Pentathlon, Netball, Rowing, Rugby, Shooting, Squash, Table Tennis, Taekwondo, Tennis, Triathlon, Volleyball (Indoor & Beach), Weightlifting, Wrestling bad ka Wushu. Katba ki jingpyni lane jingbatai (Demonstration Sports) ki long ka Mallakhamb, Kalarippayattu, Rafting bad ka Yogasana.
Ka jingïaid lynti na ka bynta ka 38th National Games ka la sdang da ka jingïateh kular (Memorandum of Understanding) ba la soi ha u snem 2014 hapdeng ka IOA bad ka Uttarakhand State Olympic Association (USOA). Ka IOA ha kaba sdang ka la buh 34 tylli ki jait jingïalehkai na ka bynta kane ka lympung.
Hynrei hadien la pynkut noh ïa ka thup jong ki 32 tylli ki jingïalehkai ïakop bad 4 tylli ki jingïalehkai pyni ha ka jingïalang ha u snem 2023. Da kaba pynroi ïa ki jaka ïalehkai kiba pawnam ha ka pyrthei ha kylleng ka Uttarakhand, ka Ïalehkai ka thmu ban buh ïa ka kyrdan kaba thymmai ha kaba kyntiew ïa baroh ar ki jingïalehkai tynrai bad kiba mynta jong ka ri India.
