Srinagar, Nohprah:
U President jong ka National Conference, u Farooq Abdullah, ha ka Lah Sngi U Blei, u la ong ba ka sorkar pdeng ka dei ban pynsangeh ïa ki kam kiba lah ban pynmih ïa ka jingïakynad ha ka ri, bad ban kheiñ ïa ki Muslim kum kiba ïaryngkat lang.
“Ka la donkam ban sangeh noh (ki jingjia kum ha Sambhal). Ngan ong ïa ka Sorkar India ba kan sangeh noh (kum kine ki kam) namar kim lah ban bret ïa ki Muslim (ka India) sha duriaw. Shano kin bret ïa ki 24 klur ngut ki Muslim? To leh ïa ki Muslim kum kiba ïaryngkat, kata ka dei kaba ka Riti Synshar jong ngi ka ïeng. Lada ki pynkhihwin ïa ka Riti Synshar, kumno ka India kan im”, la kylli u Abdullah haba kren sha ki nongthoh khubor hangne.
U President jong ka National Conference (NC), dang shen u la don bynta ha ka jingleit ïaid riewblei ha Umrah ha ryngkat u khun bad u Myntri Rangbah ka jylla u Omar Abdullah bad kiba bun ngut ki dkhot ba ïatreilang, u la ong ba ym don mano-mano ba pyrshah ïa ka jingwanphai biang jong ki Kashmiri Pandit sha ka them Kashmir.
“Mano ba khang ïa ki Pandit ka Kashmir ban wanphai? Kawei-pa-kawei ka seng saiñ pyrthei ka la ong ba ki dei ban wanphai biang. Ka dei ka rai jong ki ynda ki kwah ban wan phai. Ka dohnud jong ngi ka plie na ka bynta jong ki. Wat ha ka por ba nga dang long Myntri Rangbah ka jylla, haba ka jinglong jingman ka la shah ktah jur bha, ngi la pyrshang ban wanrah biang ïa ki”, u la ong.
Halor ki jingdawa ban bishar bniah ïa ka jingpyntreikam ba la bhah ha Jammu & Kashmir, u Abdullah u la ong ba ka sorkar ka dei ban bishar bniah kumjuh.
“Ngin sa ong ïa ka sorkar ba kan bishar bniah ïa ka. Ka jingbuh kyrpang ka dei na ka bynta ki bynta kiba duna khnang ba kin lah ban mih kum kiba ïaryngkat,” u la ong.
Ka sorkar NC ka la thaw ïa ka Cabinet Sub-Committee ban peit bniah ïa ki jingdawa ban pynbeit ryntih ïa ki jingbuh kyrpang, kiba la kiew haduh 70 per cent ha ka Union Territory.
Halor ka jingbeh kam jong u Lieutenant Governor Manoj Sinha mynshem taïew ïa ki ar ngut nongtrei sorkar namar ka jingkynnoh ba ki don ka jingïadei bad ki kam lehnoh, u Abdullah u la ong ba ka sorkar “kan peitngor ïa baroh bad kan wad ïa ka daw balei la weng kam ïa kitei ar ngut ki nongtrei”.
Une u ‘riew saiñ pyrthei ba la rim bad shemphang bha, u la pdiang sngewbha ruh ïa ka ‘jingsangeh ïasiat’ jong ka Israel bad ka Lebanon, hynrei u la wer ban pynsangeh noh ïa ki jinghiar thma ïa ka Gaza, Syria bad Iran kumjuh.
“Ka (jingsangeh ïasiat) ka dei ka sienjam kaba bha, hynrei ka long kaba donkam ban pynsangeh ïa ki jinghiar thma ba ïatreilang da ka Israel bad ka America – ha Gaza, Syria bad Iran, kiba dang ïai bteng haduh kine ki sngi. Kane ka long kaba ma. Ki dei ban pyndonkam mardor ïa ka jingsangeh ïasiat. “Phi la dei ban peit ïa ki jingïatai nia ha ka (UN) Security Council. Lada don ka jingthmu na ka bynta ka (ka jingdon jong ka) Security Council, ka dei ban trei katkum ki jingbthah ba la ai ha ka Israel. Ki dei ban pynneh ïa ka jingsangeh ïasiat bad ban ai jingkyrshan ïa ki para briew”, la ong u Abdullah.
Ha ka jingleit ïaid riewblei jong u kaba dang shen, u Abdullah u la ong ba um shym la duwai tang na ka bynta ka Kashmir, hynrei na ka bynta ki Muslim ha baroh satlak ka pyrthei.
“Ki jingeh kiba ngi ïakynduh mynta, ki lah ban long ba u Allah un pyllait ïa ngi na kine. To u Allah un ïalam ïa ngi sha ka lynti kaba dei. Nga la duwai ba ngin jngai na ki jingsniew bad ba kan kut noh ka jingshun niam kaba la saphriang ha ka ri jong ngi. Nga la duwai na ka bynta ka jingïatylli bad ka jingïasngewthuh jingmut”, u la ong.
