New Delhi, Nohprah:
Ka Supreme Court ha ka Lah Sngi U Blei ka la bthah ïa u nongïalam jong ki nongrep ka Punjab, u Jagjit Singh Dallewal, uba don hapdeng ka jingshah thngan haduh ban da ïap ha khappud Khanauri ban pynbor ïa ka sorkar ban pdiang ïa ki jingdawa jong ki nongrep ba kin pynlong ïa ka jingïakhih khlem da khang lynti ïa ki surok bah ne ban buh jingeh ïa ki paidbah.
Ka kynhun nongbishar jong u Justice Surya Kant bad Ujjal Bhuyan ki la pynkut noh ïa ka jingmudui dorkhas na ka bynta u Dallewal, uba la shah weng noh na ka jaka ïakhih ha Khanauri ha khappud Punjab bad Haryana ha ka 26 tarik, Naiwieng.
“Ngi la ïohi ba u la shah pyllait bad u la pynbor wat ïa uwei u paralok nongïakhih ban pynkut noh ïa ka jingïakhih jong u ha ka Sngi Saitjaiñ,” ong ka kynhun nongbishar bad bynrap ba ïa ka mat ba la pynpaw da ki nongrep la buh jingkynmaw da ka ïingbishar bad la pyrkhat da ka ïingbishar ha ka kam kaba dang sahteng.
“Ha ka rukom synshar paidbah, phi lah ban ïashim bynta ha ki jingïakhih kiba jai jai hynrei wat ym wanrah jingeh ïa ki briew. Baroh phi tip ba ka khappud Khanauri ka dei ka bynta ba pynim ïa ka Punjab. Ngim kren eiei la ka jingïakhih ka long kaba dei ne bakla”, la ong ka kynhun nongbisahr ha u nongïasaid aiñ u Guninder Kaur Gill, uba la mih ban leit hajir na ka bynta u Dallewal.
U Justice Kant u la ong ba u Dallewal u lah ban pynbor ïa ki nongïakhih ban pynlong ïa ki jingïakhih ba jai jai katkum ka aiñ bad khlem da wanrah jingeh ïa ki briew.
Ka kynhun nongbishar ka la ong ba ha kane ka kyrdan, kam shym la pdiang ïa ka jingujor jong u Dallewal hynrei u lah ban ïakynduh hadien.
Khyndiat kynta shwa ban sdang ïa ka jingïakhih shah thngan jong u ha ka 26 tarik, Naiwieng, la kynnoh ba la weng jubor ïa u Dallewal na khappud Khanauri bad la pynkit ïa u sha kawei ka jaka ai jingsumar ha Ludhiana. La pyllait noh ïa u ha ka janmiet jong ka Sngi Thohdieng.
Ïa ka jingujor la rah ha ka ïingbishar ba hakhliehduh ha ka 29 tarik, Naiwieng ban pynibor pyrshah ïa ka jingkem ba beaiñ jong ki pulit ka Punjab.
Ha ka 30 tarik, Naiwieng, shisngi hadien ba la pyllait ïa u, u Dallewal u la ïasoh bad ka jingïakhih shah thngan haduh ban da ïap ha khappud Khanauri ban pynbor ban pdiang ïa ki jingdawa jong ki nongrep.
Ki nongrep ki la shong la sah ha ki jaka khappud Shambhu bad Khanauri hapdeng ka Punjab bad Haryana naduh ka 13 tarik, Rymphang, hadien ba ka jingleit jong ki sha Delhi ka la shah pynsangeh ha ki bor pahara. Ki nongïakhih ki la kynnoh ba ka sorkar pdeng kam shym la shimkhia ban weng ïa ki jingdawa jong ki, da kaba kynnoh ba kam shym la don kano kano ka jingïakren bad ki halor ki jingeh jong ki naduh ka 18 tarik, Rymphang.
Nalor ka jingpynthikna ban pyntreikam ïa ka MSP, ki nongrep ki dawa ban pyntreikam ïa ki jing-ai jingmut jong ka Swaminathan Commission, ka bai bam tymmen ïa ki nongrep bad ki nongtrei lyngkha, ka jingpynlait ïa ka ram jong ki nongrep, ka jingpyntreikam biang ïa ka Land Acquisition Act, 2013 bad ka jingsiew bai lutksan sha ki bahaïing jong ki nongrep kiba la khlad noh ha ka por ba don ki jingïakhih ha ki por ba la leit, kata ha u 2020-21.
