Shillong, Nohprah 03
15 ngut ki nongïalehkai ki la shah jied ban mihkhmat ïa ka Jylla sha ar tylli ki jingïakhun jong ka U-16 Boys Vijay Merchant Trophy 2024-25 kaba long ka lympung ïalehkai ba bun sngi ban pynïaid da ka BCCI.
Ka Junior Men Selection Committee jong ka Meghalaya Cricket Association ka la pynlong ïa ka jingjied bad kan sa bishar bniah katkum ka jinglah ban ïalehkai bha ka jong ki hadien kitei ar tylli ki jingïalehkai.
Kumta ka jingïalehkai ba nyngkong jong ka Meghalaya kan long pyrshah ïa ka Andhra Pradesh naduh 6 haduh ka 8 tarik mynta u bnai bad hadien yn pynbud sa ka jingïakhun pyrshah ïa ka Hyderabad naduh 11 haduh ka 13 tarik mynta u bnai. Ïa kine ar tylli ki jingïakhun yn pynlong ha Lucknow.
Na ka liang ka MCA ka la pynlong ïa ka prokram kilanmet na ka bynta katei ka kynhun jong ki khynnah shynrang ha Shillong bad ha Nongkhrah (Ri-Bhoi) naduh ka 17 tarik u Naiwieng. Kumta kane ka kynhun ka la mih ha ka Sngi Ba-ar ban leit sha Uttar Pradesh.
Ki rangïalehkai na ka bynta kitei ar tylli ki jingïalehkai ki long u Mannan Surana, Trejosh Dey, Raunak Srivastava, Sameer Choudhary, Samelawan S Nongkseh, Krishiv Choudhary, Udit Pradhan, Trijal Agarwal, Aryan K Ray, Benhaden N Marak, Jakrasil Chuseng R Marak, Jamesbirth C Sangma, Damechua Khongsngi, Mewankitbok Kharpuri & Doangkam C Marak. Katba kiwei pat kiba la pynap lypa ki long u Abhijit Chanda, Chukam Matsram D Shira, Eshan Siangshai, Gurjit Singh & Abagtha Marak.
Ha ka liang ki coach ki kynthup ïa u Sengam G. Momin (Head Coach), Shankar Newar (Assistant Coach), Karma Sangma (Physio), Santosh Ram (Trainer) bad u Robert Z Ralte (Manager).
