Shillong, Nohprah 03
Ka Shillong Sports Association ka la sam ïa ka trophy, ki takma lem bad ki song pisa sha ar tylli ki kynhun jong ka First Division kiba la kiew kyrdan sha ka Shillong Premier League bad kin ïoh ban shim bynta naduh lashem snem.
Kine ki long ka Malki Sports Club kaba la rah ïa ka nam lahduh hadien ba ka la ïoh 21 poiñ lem bad ka Mylliem kaba la wan ba-ar ryngkat 18 poiñ.
Kumta ka Malki ka la ïohpdiang ïa ka song pisa kaba T. 2 lak bad ka Mylliem T. 1 lak nalor ka trophy lem bad ki takma.
Kane ka long ka sien ba ar ba ka Malki kan wanphai biang sha ka SPL hadien ba la shah pynhiar kyrdan teng ha ka aïom ïalehkai 2022, katba kan dei ka sien kaba nyngkong eh na ka bynta ka Mylliem.
Ïa ka nam Top Scorer la ïohpdiang da u Wallambha Kharpran na ka Sohryngkham SC, uba la lah ban thep 9 kol. Hynrei kaba sngewsih ka long ba ka klob jong u (Sohryngkham) ka la shah pynhiar kyrdan sha ka Second Division lem bad ka Umphyrnai SC.
Ha kajuh ka por, ka SSA ka la pynlong ïa ka jingpynkup burom ïa ki khynnah ïalehkai U-16 kiba la lah ban rah ïa ka nam lahduh ha ka lympung ïalehkai Meghalaya Youth League ba la pynïaid da ka Meghalaya Football Association mynta ka snem. Ha kajuh ka por ka la pynkup burom ruh ïa ki khynnah ïalehkai U-14 kiba la shah rem noh ha ka jingïakhun semi final jong katei ka lympung.
Nalor ki dkhot ka SSA, la ïadon lang ki kmie ki kpa lem bad ki khynnah.
