Bengaluru, Nohprah:
Ka Karnataka, ka la pynpaw ïa ka jingkiew bun ha ka jingïoh khajna, ha kaba u Myntri Rangbah ka jylla, u Siddaramaiah, u la bishar bniah ïa ka jingtreikam jong ki tnad treikam ba kongsan, ba kynthup ïa ki Commercial Taxes, Excise, Stamps and Registration, bad ki Mines and Geology, ha ka jingïalang jong ki heh sorkar, la ong ka ophis treikam jong u ba ha khlieh duh, ong ka ophis jong u, ha ka jingpynlait khubor.
Ka jingbishar bniah ka la pynpaw ïa ka jingkiew ka ïoh ka kot kaba khlaiñ jong ka Karnataka bad ka jingtreikam kaba kham bha ha ka khajna, khamtam ha ka jinglum GST, kaba la palat ïa ka jingkheiñ kyllum jong ka ri.
Ka tnad Commercial Taxes ka la pyntip ba ka la lum khajna haduh T.53,103 klur haduh u bnai, Naiwieng, kaba la lah ban pynurlong da 94 percent jong u snem haduh mynta kaba long T.56,317 klur, la ong ka ophis treikam jong u.
Da ka thong ba shisnem kaba long T. 84,475 klur na ka bynta u snem 2024-25, u Myntri Rangbah ka jylla u la kyntu ïa ki heh sorkar ban pynleit jingmut ha ki thaiñ kiba duna ka jingtreikam kum ka Malenadu bad Mysuru ban pynurlong ïa ki thong.
Ka jinglum khajna GST ka la kiew da 15 percent ha kaba ka Karnataka ka la noh synñiang haduh T.13,722 klur, kaba la buh ïa ka jylla ha ka kyrdan ba ar ha ka ri baroh kawei ha ka jinglum khajna GST, kumba la ïathuh da ka CMO.
Ka tnad Excise ka la lum pisa haduh T.23,600 klur, kaba kot sha ka 61.26 percent na ka thong jong ka shisnem kaba long T.38,525 klur na ka bynta u snem 2024-25.
Ka khajna ka la kiew da T.1,432 klur, kaba pyni ïa ka jingkiew kaba 6.46 per cent haba ïanujor bad u snem ba la dep, la ong ka khubor.
La pyntreikam ïa ki lad ban pynbeit ïa ki kam bad ban pyndap ïa ki kam ba lait ha ka Group C ban kyntiew ïa ka jingtreikam. Ka tnat Stamps and Registration ka la ïoh ïa ka jingïohnong kaba T.15,161 klur, kaba la lah ban pynurlong ïa ka 58 percent na ka thong jong ka shisnem kaba long T.26,000 klur.
Haba ïanujor bad u snem ba la dep, ka jingïohnong ka la kiew da 21 percent, kaba la pynlong da ki lad ban tehlakam ïa ka jingpynrung kyrteng be-aiñ bad ban kynthup ïa ki jaka bym pat kheiñ ha ka khajna, la ong ka kyrwoh khubor.
Ka tnad Mines and Geology ka la pyntip ba ka la lum khajna haduh T.4,862 klur haduh u bnai Naiwieng, pyrshah ïa ka thong ba man la u snem kaba long T. 9,000 klur, kaba pyni ïa ka jingkiew kaba 10 percent na ka snem sha ka snem, katkum ka jingong jong ka CMO. Ki jingïakren ki long halor ka jingpynbeit ryntih ïa ki rukom pyntreikam halor ka khajna jong ki marpoh khyndew bad ban pynbha ïa ka jingmih na ki marpoh khyndew kiba rit. U Myntri Rangbah u la ban jur ïa ka jingdonkam ban pynjur ïa ka jingpyrshang ban pynurlong ïa ki thong ba man la u snem.
U la bthah ïa ki heh sorkar ban pynkhlaiñ ïa ka jingpeitngor ban khanglad ïa ka jinglait khajna, ban pynlong ïa ki jingïakhih ba kyrpang ha ka tnad Commercial Tax bad Excise, ban pynbeit ïa ki aplikeshon GST kiba dang sahteng ban pynsted ïa ka jingpynmih khajna, bad ban pynbeit ïa ki rukom treikam e-Khata ha ka tnad Stamp bad Registration. La bthah ïa ki heh sorkar ban pyntreikam kloi ïa kine ki lad ki lynti ban pynneh ïa ka jingkiew jong ka ïoh ka kot jong ka Karnataka.
