Srinagar, Nohprah:
Ki pulit jong ka Jammu & Kashmir ki la ïathuh ba u lehnoh uba donkti ban pynïap ïa ki 6 ngut nongtrei bad ïa uwei u doktor ha kawei ka ïingsah jong kawei ka kompeni riewshimet ha Ganderbal, u la shah siat ïap ha ka por ba la don ka jingïaisat kaba markylliang.
Une u lehnoh u la shah pynïap ha ka por ba don ka jingïasiat mar kylliang kaba la jia ha ki bynta ba shalor jong ka khlaw Dachigam.
Ïa une u lehnoh la tip kyrteng kum u Junaid Ahmed Bhat. Kumba la ïoh jingtip, la ong ba u dei na ka kynhun lehnoh Lashkar-e-Taiba kaba na Pakistan.
Kum shi bynta ban pyntikna halor ka jingïap jong une u lehnoh, ki pulit ka Kashmir Zone ki la buh jingthoh ha ka rynsan X ha kaba la ong, : Ha ka jingkhynra kaba dang ïaid shakhmat, uwei u lehnoh u la shah pynïap bad la ithuh ïa u kum u Junaid Ahmed Bhat (LeT, Category A). Une u lehnoh u dei uba donkti ban pynïap ïa ki riew paidbah ha Gagangir, Ganderbal bad ha kiba bun kiwei pat ki jingjia jong ka jingthombor ki lehnoh.”
Ki la don kumba 7 ngut ki nongtrei, kynthup ïa uwei u doktor ha Kashmir, kiba la ïap ha ka janmiet jong ka 20 tarik, Risaw, ha ka jingthombor jong ki lehnoh ha kawei ka jaka treikam jong ki nongtrei hajan ka jaka jngohkai pyrthei jong ka Sonamarg ha ka surok bah Srinagar-Leh. Ha kane ka jingshah thombor, ki la don ruh sa 5 ngut kiwei pat ki nongtrei kiba la mynsaw.
