Chandigarh, Nohprah:
Ki pulit ki la kem noh ïa uwei u briew hadien ba u la pyrshang ban siat ïa u nongïalam ka Shiromani Akali Dal u Sukhbir Singh Badal ha khyrdop jong ka Golden Temple ha Amritsar ha ka Sngi Ba-ar. Ki briew kiba ïadon lang hajan kane ka jaka ba une u briew u la thmu thombor ki la khanglad ïa kane ka jingthmu bad bat ïa u kumjuh ban aiti noh sha ki pulit.
U Sukhbir Badal, uba dang shong ban ap ïa ka khyrdop shabar ka jaka mane blei kum ka jingshah pynshitom kaba u la ïoh ha kaba ïadei bad ki hukum niam, u la lait im khlem shah pynmynsaw, la ïathuh ka tyllong khubor.
Ïa une u briew uba la shahkem la tip kyrteng kum u Narain Singh Chaura. Katkum ka jingïathuh jong ki lad pathai khubor la ong ba u Chaura u dei u lehnoh barim jong ka kynhun Babbar Khalsa International (BKI).
U Badal ha ka Sngi Ba-ar u la sdang ban shakri ïa ka jingap khyrdop kum ka jingpynshi-tom niam kaba la ai ïa u da ka kynhun ba ha khlieh duh jong ki Sikh-Akal Takht ha kaba ïadei bad ka jingpynkheiñ kyndon niam ha u snem 2015.
U nongïalam ka Punjab uba shong ha ka shuki shaka la ïohi ba u shong ha ka jaka rung jong ka Golden Temple ha Amritsar ha ka step jong ka Sngi Ba-ar ryngkat ka kieng da ka jingthoh ha ryndang bad bat ruh ïa u sum ha ka kti.
U heh nongïalam jong ka seng Akali Dal u Bikram Singh Majithia, uba dei u kynum jong u Badal, u la sdang ban leh ïa ka kam jong u kum shi bynta jong ka jingshah pynshitom da kaba sait ïa ki tiar ha Golden Temple.
Ka Akal Takht ka la pynshitom ïa u Sukhbir Badal da ka kam pynkhuid ha ki kamra shet jingshet bad ki kamra shet jong katto-katne tylli ki Gurdwaras, kynthup ïa ka Golden Temple jong ka Amritsar, namar ba u la leh sbun ïa u heh jong ka Dera Sacha Sauda, u Gurmeet Ram Rahim, ha ka jingpynkheiñ kyndon jong u Guru Granth Sahib ha u snem 2015.
U kpa jong u, uba la khlad noh, u Parkash Singh Badal, uba dei ruh u Myntri Rangbah barim jong ka Punjab, u la shah knieh noh ïa ka burom Fakhr-e-Qaum (ka jinglong kyrpang jong ka kynhun Sikh) kaba la ai sha u ha u snem 2011, na ka bynta ka jingshakri ïa ka kynhun.
