Shillong, Nohprah 05
Ka Meghalaya Sport Climbing and Mountaineering Association (MeSCMA) ka la pynlong ïa ka State Level Sport Climbing Selection Trials ha ka climbing wall jong ka 58 GTC, Happy Valley, Shillong bad ka jingthmu jong kane ka long ban jied ïa ki nongïashim bynta ban mihkhmat ïa ka Jylla sha ka jingïakop kiew lum jong ka North East Zone Sport Climbing Competition 2024 ka ban long ha ka taïew balai jong u bnai Nohprah bad ha kajuh ka por ban pynkhreh ruh ïa ka Meghalaya Games 2025.
U Bah DD Shira (MCS), Director ka tnat ïalehkai jong ka Sorkar Jylla u la long u kongsan ha kane ka sngi plie bad ïa kane ka prokram la kyrshan da ka tnat ïalehkai.
Baroh ki don haduh 52 ngut ki nongïashim na ki district bapher bapher kum na Garo Hills, Jaiñtia Hills, Ri-Bhoi, West Khasi Hills bad East Khasi Hills.
Na ka liang ka synjuk ka la pynpaw ka jingsngewnguh ïa u Commandant jong ka 58 Gorkha Training Centre, uba la ailad ïa ki dkhot bad ki nongkiew lum ban pyndonkam ïa ki jaka kiew lum jong ki na ka bynta ki jingpyrshang ban jied ïa ki nongkiew lum kiba kynsai.
