Shillong, Nohprah 06
Ka jylla Meghalaya hapoh ka jingpeit bad jingkyrshan jong ka Meghalaya Athletics Association ha ka kam ïalehkai kan sa ïashim bynta ha ka lympung ïalehkai 39th National Junior Athletics Championship 2024, ka ban long ha Bhubaneshwar, Odisha naduh ka7-11 tarik u Nohprah.
Ïa kane ka lympung Athletics Championship la pynkynriah noh ha kaba sdang jong mynshem bnai namar ka ‘erïong Dana.
Ka kynhun jong ka jylla Meghalaya ka la mih mynta ka step bad kan poi sha Odisha ha ka 5 tarik janmiet. Ki nongshim bynta ha ki jingïalehkai ki long u Rikangku D Sangma ha ka kyrdan U14, boys na ka bynta ka Kids Javelin bad ka Triathlon B, ka Rukini RT Dkhar (U16, Girls) ha ka 600M, ka Anrisha Klein (U20, Women) ha ka High Jump, u Donbok Shabong (U20, Men) ha ka 400M, ha kaba u Pleasantly Synnah u long nonghikai bad u nongpynïaid ka Athletic Coach, Department of Sports and Youth Affairs.
Ha ka lympung ïalehkai 35th East Zone Junior National Athletics Championship 2024 kaba dang shu dep ar bnai mynta ha Odisha. U Rikanku D Sangma u la khur ïa ka takma rupa ha ka Kids Javelin bad ka kyrdan ba 4 ha ka Triathlon B. Ka Meghalaya kam shym la ïoh khur ïa kano-kano ka takma ha ka National level ha ka Athletics la slem bha bad ka don jingkyrmen kaba khraw na ka liang ka jylla ba un ïoh khur ïa ka takma na ka bynta ka Meghalaya mynta ka kynti ha kane ka Championship.
Na ka East Zone Championship ba la dep, ka Anrisha Klein ka la ïoh ïa ka takma rupa ha ka High Jump, u Donbok Shabong u la ïoh ïa ka takma ksiar ha ka 4 X 400M Mixed relay bad ka Rukini R.T. Dkhar ka la jan ïoh takma ksiar bad wan noh ha ka kyrdan ba saw bad la khmih lynti baroh kine ki nongïalehkai kin wan ha ka kyrdan ba ha khlieh duh ha ki jingïalehkai, ban pynlong ïa ki jinglehkai ba thymmai bad wanrah ïa ki takma na ka bynta ka jylla.
La pyntip ruh ba tang kito ki nongïalehkai kiba lah ban ïaid lyngba ïa ka Entry Standard jong ka Athletics Federation of India kiba lah ban ïashim bynta ha kane ka 39th National Junior.
