New Delhi, Nohprah:
Ki la don palat 40 tylli ki skul ha Delhi kiba la ïoh ïa ka jingbyrngem buh bad shah pynbthei bom lyngba ka email. Hadien ba la khmih bniah ïa baroh ki skul ha Delhi, ki pulit ki la pynbna ba ka dei ka jingbyrngem ba shu thok.
Ka DPS RK Puram bad ka GD Goenka School ha Paschim Vihar ki dei napdeng ki 44 tylli ki skul kiba la ïoh ïa ka jingbyrngem, kaba la pynlong ïa ka ban leh eiei.
Kiba bun ki khynnah pulie ki la shah pynphai noh sha ïing, katba dang phah khubor halor kine ki jingjia sha ki pulit. Katkum ka kopi jong katei ka Email kaba la ïoh da ka NDTV, la ong ba ïa katei ka Email la phah ha ka por 11:38 ha ka miet sngi U Blei.
Ka Email ka la kam ba la buh bun tylli ki bom hapoh ki ïingskul.”Ki bom ki long kiba rit bad kiba la buhrieh bha,” kumba la paw ka jingthoh ha ka Email. U nongphah ïa kine ki khubor pyntriem u la dawa da $30,000 ban pynduhbor ïa ki bom.”Kan ym pynjulor than ïa ka ïingskul, hynrei bun ki briew kin mynsaw ynda ki bom kin bthei. Phi baroh phi dei hok ban shah shitom bad duh ïa ki dkhot met,” la thoh u nongphah ïa ka khubor pyntriem.
Ki pulit ka Delhi ki dang tohkit bniah halor ka IP Address bad wad bniah ïa u runar uba la phah ïa ka Email. Ka jingpynbna ka la long ha ka por mynstep ha ka por ba ki bus skul ki la poi ha ki skul, ki kmie ki kpa ki dang leit buh ïa ki khun sha skul, bad ki nongtrei skul bad ki nonghikai ki dang pynkhreh na ka bynta ka jingïeng Assembly.
Ka tnat pyllip ding jong ka Delhi ka la ïoh nyngkong ïa ka Call na GD Goenka School ha ka por 6:15 mynstep bad bud sa kawei pat ka Call kaba la wan na ka skul DPS RK Puram ha ka por 7:06 mynstep.
Ki kynhun pyllip ding, kynthup ïa ka kynhun jong ki ksew sma dien, ki kynhun wad bom, bad ki pulit ka thaiñ, ki la poi sha ki skul bad ki la pynlong ïa ka jingwad bniah. Haduh ba la thoh ïa ka khubor ym pat lap ïa kaei kaei kaba pynsuba ne buh jingma, la ong u heh pulit.
Kum shi bynta ban pynpaw ka jingsngewsih halor ki jinglong jingman ha kaba ïadei bad ka shongsuk-shongshngaiñ ha ka nongbah jong ka ri, u Myntri Rangbah barim ka Delhi u Arvind Kejriwal u la pan jubab na u Amit Shah u Myntri ka tnat ki kam poh ïing.
Ha ka jingthoh ha ka Social Media lyngba ka rynsan ha ka X, u Kejriwal u la thoh, “ki paidbah ka nongbah Delhi kim pat ju ïohi mynno mynno ruh ïa ka jinglong jingman kaba sniew ha ka aiñ synshar bad ka suk ka saiñ ha Delhi. U Amit Shah u dei ban ai jubab ïa ki paidbah ka nongbah Delhi.”
Ka Myntri Rangbah ka Delhi ka Atishi ruh ka la buh jingkylli ïa ka sorkar pdeng kaba la synshar da ka BJP halor ka jingkiew ki kam pynïap briew, ka jingsiew bai lutksan, ka jingsiat bad ka jingbyrngem buh bad pynbthei bom ha Delhi. “Ka jinglong jingman jong ka synshar-khadar bad ka suk ka saiñ ha Delhi kam pat ju long kaba sniew kumne mynno mynno ruh. Ka sorkar pdeng kaba la synshar da ka BJP ka la bakla ha ka kam kaba tang kawei jong ka ban ai jingshngaiñ ïa ki paidbah ka Delhi…,” ka la thoh.
