Patna, Nohprah:
U Myntri ka tnat ki kam pohïing jong ka sorkar pdeng bad u Myntri ka tnad Cooperation u Amit Shah ha ka sngi U Blei u la ong ba ka India kan thaw ïa ka kynhun ban ïakhun pyrshah ïa ki Drone kaba biang nadong shadong ban ïada ïa ka ri na ki jingma kiba lah ban wanrah da ki Drone.
Haba kren ha ka Raising Day Parade kaba 60 jong ki shipai ïada khappud jong ka tnat Border Security Force kum u kongsan ha Jodhpur, Rajasthan, u Shah u la pynpaw ba ka jingeh kiba mih na ki Drone ka la buh ban nang kham pynjur ha ki sngi ban wan.
U la ong ba da kaba ithuh ïa ka jingeh, la pynwandur ïa ka rukom buh suloi ki ban ïakhun pyrshah ïa ki Drone kaba la pynkhreh da ki Laser lyngba ka “jingtreikam jong ka sorkar baroh kawei” kaba kynthup ïa baroh ki bor pahara khappud, ka tnad ïada ri, u DRDO, bad ki tnad wadbniah bapher bapher jong ka sorkar India.
U la kdew ba 55 percent na ki jingwan rung ki Drone ha shilynter u pud u sam jong ka pyrthei bad ka Punjab la khanglad bad pynduh pyndam da kaba pyndonkam ïa kane ka rukom, ka jingkiew kaba khraw na kaba don kumba 3 percent hashwa.
“Hapoh khyndiat snem, yn sa thaw ïa ka kynhun ban ïakhun pyrshah ïa ki Drone kaba bniah ban ïada ïa ka ri na ki jingma kiba mih na ki Drone”, u la ong.
U Myntri ka sorkar pdeng u Gajendra Singh Shekhawat, u Director General jong ka kynhun BSF u Daljit Singh Chaudhary, bad kiwei kiwei ki riew pawkhmat ki la ïadonlang ha kane ka sngi.
U Shah, u ïathuh ba ka sorkar u Modi, ka la wanrah ruh ïa ka rukom pynïaid ïa ki khappud (CIBMS) na ka bynta ban buddien ïa ki jaka ba sngewkhia ha shilynter ki khappud jong ka pyrthei, bad ba ki jingmih ba nyngkong na ka Pilot Project ha Dhubri, Assam, ki la long “kiba ai mynsiem shibun”.
Hadien katto katne ki jingpynbha, yn sa pyndonkam ïa kane ka rukom sha shiliang ki khappud bad ka Pakistan bad ka Bangladesh.
La pyrshang ruh ban pynkhlaiñ ïa ka jingker khappud, ban shna ïa ki surok ha ka liang jong ka ri India ha khappud, bad ban shim ïa ki katto katne kiwei pat ki kam pynroi, la ong u Myntri.
U Myntri ka tnat ki kam pohïing u la ong ba ban pynbiang ïa ki jingdonkam ba nang kiew jong ka ri ha ka liang ka jingïada kan long kaba ym lah ban leh khlem ki BSF, kiba la kiew na ka 25 tylli ki kynhun shipai ha ka por ba sdang sha ka 193 tylli ki kynhun shipai mynta.
Da ki 2.7 lak ngut ki shipai, ka BSF ka dei ka kynhun ïada khappud kaba heh tam ha ka pyrthei, u la ong.
Ha u snem 2024, ka tnat BSF ka la pynneh ïa ka Record jong ka ban ïakhun pyrshah ïa ka pisa thok, ki jingdih pynbuaid, ka jingwan rung tuh, bad ka jingleh donbor jong ka kynhun lehnoh lyngba ki jingtreikam bapher bapher, u la kdew.
Kum ka laiñ ïada banyngkong eh jong ka jaitbynriew, 1992 ngut ki shipai BSF ki la aiti ïa la kajong ka jingim, bad 1,330 ngut na ki la ïoh ïa ki takma.
Kine ki kynthup ïa kawei ka Maha Vir Chakra, 6 tylli ki Kirti Chakra, 13 tylli ki Vir Chakra, 13 tylli ki Shaurya Chakras, 56 tylli ki takma Sena, bad 1,241 tylli ki takma pulit, la ong u myntri.
U Shah u la ban jur ba ka sorkar u Modi ka la shim katto katne ki sienjam na ka bynta ka jingbha jingmiat jong ki bor pahara.
“Lyngba ka Ayushman – Central Armed Police Forces (Ayushman CAPF skhim) la lah ban ai ïa ki Card sha ki 41,21,443 ngut ki shipai bad kiba haïing hasem jong ki. Da ki hajar tylli ki hospital la pynïasoh bad kane ka Card ban pynthikna ïa ka jingsumar pang na ka bynta ki shipai bad ki bahaïing jong ki,” ong u Shah da kaba bynrap ba ïa ki jingshim pisa kaba T.1,600 klur, kaba kynthup ïa ki 14.83 lak tylli kiwei pat, la lah ban pyndep haduh mynta.
