Shillong, Nohprah 16
U Vice Chancellor ka skulbah North Eastern Hill University (NEHU), Prof. Prabha Shankar Shukla u la pynjlan biang ïa ka jingshim shuti haduh ka 29 tarik mynta u bnai.
“Ha ka jingbteng jong ka email ka jong nga, kaba la phah ha ka 1 tarik Nohprah, 2024 kaba ïadei bad ka jingshim shuti (earned leave) ka jong ka, nga kyrpad ban pynjlan biang ïa kane tad haduh ka 29 tarik Nohprah namar ki daw bym lah kiar,” la ong u Prof. Shukla ha ka email kaba la phah sha u Registrar jong katei ka skulbah ha ka Lah Sngi U Blei.
U la ong ruh lada don kino-kino ki kam kiba kyrkieh la ha ka liang ka jingpule ne ka kam synshar, u registrar u lah ban pyntip sha u lyngba ka phone ne email.
Shuh shuh u Prof Shukla u la ong ba u Senior Most Professor lane u Pro Vice-Chancellor ba kin peit ïa ki kam ba man ka sngi jong ka skulbah ha ka por ba um don.
Lah ban kdew ba ka jingpynjlan ïa ka shuti jong u Vice Chancellor ka NEHU ka la kut ha ka 13 tarik u Nohprah.
Ka komiti jong ar ngut ki dkhot kaba la thaw da ka Ministry of Education ka Sorkar Pdeng ka la pan por ban pynjlan por sa 15 sngi ha ka 29 tarik u Naiwieng ban aiti ïa ki jinglap jong ki.
Ka jingpynjlan ïa ka por ka la kut noh ha ka 13 tarik u Nohprah khlem kano-kano ka jingaiktien na ki heh na ka Ministry la ka la don ne em ka kaiphod kaba la aiti.
Lah ban pynkynmaw ba u VC u la leit shuti hadien ba ki samla pule ki la pynkhihwin da ka jingkyrshan jong ki nonghikai bad ki bym dei ki nonghikai namar ka jingkynnoh ba u la leh bakla bad ka rukom treikam jong u ha ka taïew nyngkong jong u Naiwieng. Ki samla pule ki la pynlong ruh ïa ka jingshong shah thngan haduh jan kot lai taïew eiei.
U VC u la thoh sha ka Ministry of Education ka Sorkar Pdeng ban pan “ka jingkyrshan pahara kaba biang na ka Sorkar Pdeng” ba un lah ban sdang biang ïa ka kam jong u ha NEHU naduh ka 2 tarik u Nohprah hynrei hadien u la pynjlan ïa ka shuti jong u haduh ka 13 tarik u Nohprah.
