Shillong, Nohprah 17
Ka Sorkar Jylla ha ka Sngi Ba-ar ka la pynbna ba ka jingjied thymmai ïa ki MDC sha ka Ïingdorbar Thaw Aiñ jong ka Khasi Hills Autonomous District Council (KHADC) bad Jaiñtia Hills Autono-mous District Council (JHADC) kan long ha ka 21 tarik Rymphang, 2025, katba ka sngi ban ñiew ïa ki ‘vote’ kan long ha ka 24 tarik Rymphang.
Haba kren sha ki lad pathai khubor, u Symbud Myntri Rang-bah ba khmih ïa ka District Council Affairs (DCA), Bah Prestone Tynsong u la pyntip ba u Lat ka Jylla u la mynjur ïa ka jingai jingmut jong ka kynhun Myntri kaba la pynshong nongrim na ka jingtyrwa jong ka Tnad DCA ban pynlong noh ïa ka ilekshon sha ar tylli ki District Council.
U la ïathuh ba ka sngi ban thep ‘vote’ kan long ha ka 21 tarik Rymphang bad ïa ka ‘result’ yn sa pynbna ha ka 24 tarik jong ujuh bnai.
U la pyntip ruh ba ïa ka jingpynbna jong kane ka ilekshon MDC yn sa pynmih ha ka 27 tarik Kyllalyngkot ka ban bud da ka jingïathep kyrteng ki kyrtong naduh ka 28 tarik Kyllalyngkot haduh ka 3 tarik u Rymphang. Nalor kane, u la pyntip ba ha kane hi ka sngi yn sa pyndep ka jingbishar ïa ki kot ki sla ki kyrtong bad ka sngi khatduh ïa ki kyrtong ban weng kyrteng kan long ha ka 4 tarik Rymphang.
“Ka sngi ban ïathep ‘vote’ kan long ha ka 21 tarik u Rymphang bad ïa ka result yn sa pynbna ha ka 24 tarik Rymphang” ong u Bah Prestone.
Shuwa kane, u Symbud Myntri Rangbah u la pyntip ba ka sngi ban pynmih ïa ka draft electoral roll kan long ha ka 13 tarik u Kyllalyngkot bad ka sngi khatduh ban ïa kam kyrteng ne pyrshah kan long ha ka 22 tarik Kyllalyngkot. U pyntip ba ïa ka electoral roll ba khatduh yn pynmih ha ka 27 tarik u Kyllalyngkot.
Haba kylli, u Bah Prestone u la pyntip ba kat kum ka aiñ, ka Model Code of Conduct kan treikam naduh ka sngi ba pynmih ïa ka jingpynbna kata naduh ka 27 tarik u Kyllalyngkot. Ka MCC kan treikam hapoh u pud u sam ka KHADC bad JHADC.
Haba ïadei pat bad ka jingpynlut ïa ka ilekshon, u Bah Prestone u la ong ba ka pisa na ka bynta kane ka kam yn sa khate na ka bhah ba dei ban ai sha ka KHADC bad ka JHADC.
