Shillong, Nohprah 17
U Myntri Rangbah ka Jylla, Conrad K Sangma ha ka Sngi Ba-ar u la pynshai ba ki la thaw aiñ ïa ka Meghalaya State Investment Promotion & Facilitation (MSIPF), Act, 2024 ban thaw ïa ka Invest Meghalaya Agency (IMA) ban kyntiew ïa ka kam khaïi-pateng bad ban kyntiew ïa ka roi ka par bad ka ïoh kam ïoh jam.
Haba kren ha ka jingïalang ha ka por ba plie ïa ka prokram wad bniah jong ka KHADC, u Myntri Rangbah u la ong ba ka IMA kan bujli noh ïa ka ‘single window agency’ kaba la pyntrei da ka tnat Industries.
Da kaba pynpaw ba wat la ka tnat Industries ka dei ka ‘nodal agency’, hynrei u la ong ba ka rukom treikam ka long kaba eh khyndiat namar ban ïaid lyngba ka jingpyllait ïa ka ‘single window’ ki nongbei tyngka ruh kin donkam ban ïatreilang bad ki tnat ba dei peit la ka long ka bording, ka rep ka riang ne ka kam jngohkai pyrthei.
“Namar kata, ngi la sngewthuh ïa ka jingdonkam ban buh ïa kiei-kiei bad ngi la rai ban pynïasoh lang ïa baroh ki tnat hapoh ka komiti ba la khlieh da u Myntri Rangbah ka Jylla, kaba ngi khot ka IMA”, la ong u Conrad.
U Myntri Rangbah u la ong ba ka Jylla ka thmu ban pynkylla sha ka jaka bei tyngka kaban ïada ïa ka mariang kaba ïoh ïa ka jingroi kaba pura, kaba pynkup bor ïa ki nongshong shnong, bad ban pynroi ïa ka ïoh ka kot kaba neh.
Katkum ka jingong jong u, kin kiar na ki karkhana ki bym ïadei bad ka mariang katba lah bad kin pynleit jingmut ha ki karkhana kiba pynshong nongrim ha ka teknoloji thymmai kiba lah ban kiew bad kiba lah ban ai ïa ka lad kamai kaba heh kum ka jingpynmih marbam, kaba bha ïa ki nongrep bad kaba bha ïa ka pyrthei.
Shuh shuh u la ong ba ka jingbei tyngka na ki riew shimet ka long kaba kongsan bha na ka bynta ka jylla ba kan lah ban kot sha kata ka thong ban kiew 10 million ha ka ïoh ka kot bad ruh ban kot sha ka thong ban pynmih kam haduh 5 lak tylli.
U Conrad u la ong ba ka la don ka jingdonkam ban thaw ïa ki hotel kiba heh, ki karkhana IT bad ki karkhana pynmih dawai (pharmaceutical industries).
U Myntri Rangbah u la ong ruh ba ka jingmut kaba ki la sdang ka long ban pynrung ïa kawei ka portal ha kaba ki nongbei tyngka shimet ki lah ban shu aplai naba kim donkam ban wan da ka met bad ong ruh ba ki nongbei tyngka shimet ki lah ban aplai ha ka portal, bad ruh ba yn ai jingbit ha ka por ba la buh.
U la ong ba ka (MSIPF), Act, 2024 ka ailad ïa ka IMA ban bat ïa ka jaka, ban thied bad ban ai wai sha ki riew shimet ha ka rukom kumba juh leh ka MIDC ne ka MTDC.
U Myntri Rangbah u la pynshai ruh ba ki jingbit kiba donkam na ka KHADC na ka bynta ki nongbei tyngka shimet ki long kiba donkam.
“Kumta kam don jingkylli ba kin ïaid lait ïa ka KHADC. Kawei pa kawei ka tnat ka la ïoh ïa ka bor jong ka katkum ki kyndon jong ka riti synshar. Ym lah ban pynrem ïa kita ki bor, bad kumta yn bud ïa kita ki rukom treikam baroh,” la ong u Conrad.
U la ong ba ka kynhun Myntri ka la ïakren sani bha namar ba ka dei ka mat kaba pynïadei bad ka khyndew ka shyiap kaba long ka jingdon jingem kaba kongsan tam jong ki paidbah trai shnong, ka imlang sahlang bad ka jylla.
