Shillong, Nohprah 19
U Nongïalam ka National Peoples’ Party (NPP), Bah Sniawbhalang Dhar uba long ruh u Symbud Myntri Rangbah ka Jylla, u la ong ba ka umsaw jong ka VPP kan nym neh bad treikam namar ki man la ka sngi ki mih ki jingkylla bathymmai.
Haba kren sha ki lad pathai khubor, u Bah Sniawbhalang u la ong, ka NPP ka la long kaba la khreh na ka bynta ka ilekshon MDC ka ban long ha u bnai Rymphang, 2025 bad ïa ka thup kyrteng jong ki kyrtong kiba dang sah, yn sa pynbna shwa ka Khrismas lane shwa jong u snem thymmai.
“Na kawei ka sngi sha kawei ka sngi, ki jingkylla ki la don, kumta nga sngew ba ka umsaw jong ka VPP kan nym neh bad treikam. Hadien ka ilekshon, ngin sa thaw ïa ka Executive Committee (EC) ha KHADC bad JHADC bad lada duna ha u number ruh, ngin sa ïatreilang bad kiwei pat ki seng,” la ong u Bah Sniawbhalang.
Haba kylli halor ka jinglah bad treikam jong ka VPP, une u Nongïalam ka NPP u la ong, “Ngam ïohi satia kano kano ka jingtrei ne jinglah haduh mynta na ka VPP bad dei tang ka NPP kaba la lah ban trei bha bad ka Sorkar MDA hapoh ka jingïalam ka NPP ka la lah ban wanrah bun ki kam pynroi.”
“Ha ka politik hi, kino-kino ki seng saiñpyrthei ki lah ban kam da kumne da kumtai, hynrei kaei kaba nga la ju kren ne ïathuh lypa, barabor ka ju dei beit, kumta nga la thikna ba ka umsaw ka VPP kan nym treikam namar ki paidbah nalor ba ki long kiba stad, ki la sngewthuh bha ruh ïa ka rukom treikam,” la ong u Bah Sniawbhalang.
“Ngam ïohi satia kano-kano ka jingman na ka liang ka VPP bad ngin ïakhun katkum ka bor bad jingkhlaiñ jong ngi bad ngi donkam ban trei shitom namar kano-kano ka ilekshon hi kam dei kaba suk bad khamtam lei haba ngi don ha ka Sorkar, kumta ka jingshah kynthoh kynnoh ruh ka jur bha, kaba long thik kum uto u dieng uba bun soh, ki nongkawang maw ruh ki bun,” u la ong.
